صوبائی ڈیزائنر مینجمنٹ اتھارٹی (پی ڈی ایم اے) نے پنجاب کے بیشتر اضلاع میں مون سون بارشوں کی پیشگوئی کی ہے۔
تفصیلات کے مطابق صوبائی ڈیزائنر مینجمنٹ اتھارٹی کا بتانا ہے کہ پنجاب کے بیشتر اضلاع میں موسم گرم اور مرطوب رہے گا۔
ترجمان پی ڈی ایم اے کے مطابق پنجاب کے بیشتر اضلاع میں 13 سے16اگست تک مون سون بارشوں کے امکانات ہیں، سیالکوٹ، نارووال، شکرگڑھ، لاہور، گوجرانوالہ، گجرات، منڈی بہاالدین میں بارش ہوسکتی ہے۔
اس کے علاوہ راولپنڈی، اٹک، جہلم، چکوال، مری، گلیات میں گرج چمک کے ساتھ بارش کا امکان ہے، ترجمان نے بتایا کہ پنجاب کے دریاؤں میں پانی کا بہاؤ معمول پر آتا جارہاہے۔
ترجمان پی ڈی ایم اے نے بتایا کہ دریائے چناب، راوی، جہلم اور ستلج میں پانی کا بہاؤ نارمل سطح پر ہے تاہم دریائے سندھ میں تونسہ کے مقام پر نچلے درجے کا سیلاب ہے۔
ترجمان نے بتایا کہ تونسہ بیراج میں پانی کی آمد310873 اور اخراج 293073 کیوسک ہے، سدھنائی شاہدرہ اور خانکی کے مقام پر پانی کی سطح میں معمولی اضافہ ریکارڈ کیا گیا ہے۔
