اسلام آباد: پاکستان پیپلز پارٹی نے پارٹی مخالفت کے باوجود پیکا ایکٹ کی حمایت کا فیصلہ کر لیا ہے۔
پارٹی ذرائع کے مطابق پیپلز پارٹی ایوان بالا میں پیکا ایکٹ کی حمایت کرے گی، حالاں کہ پی پی کی سی ای سی نے ایکٹ پر تحفظات کا اظہار کیا تھا۔
ذرائع نے بتایا کہ سی ای سی کے تحفظات پر پیکا ایکٹ کا معاملہ پارلیمانی کمیٹی کو بھجوایا گیا تھا، جس پر پارلیمانی کمیٹی نے ایکٹ پر تحفظات سے حکومت کو آگاہ کر دیا۔
اب پی پی ذرائع نے دعویٰ کیا ہے کہ حکومت نے پیکا ایکٹ پر تحفظات دور کر دیے ہیں، اور سی ای سی نے ایکٹ پر واضح مؤقف اپنانے کا مطالبہ بھی کیا تھا، ذرائع کا کہنا ہے کہ پارٹی نے اب ایکٹ کی حمایت کا فیصلہ کر لیا ہے۔
’حکومت نے پیکا آرڈیننس پر میڈیا سے دھوکا کیا‘
یاد رہے کہ گزشتہ روز سینیٹ کی قائمہ کمیٹی برائے داخلہ نے پیکا ایکٹ میں متنازع ترمیمی بل کی منظوری دے دی ہے، سیکریٹری داخلہ نے بتایا قانون لوگوں کے تحفظ کے لیے لایا گیا، سینیٹر عرفان صدیقی نے طنزاً کہا کہ اس ملک میں کسی کو ہتھکڑیاں لگانے کے لیے ضروری نہیں کہ کسی قانون کی ضرورت ہو۔
پی ایف یو جے کی پیکا ایکٹ متنازع ترمیم کیخلاف کل ملک گیر احتجاج کی کال
سینیٹر کامران مرتضیٰ نے کہا کہ اس بل میں بہت سی کمزوریاں ہیں، فیک نیوز کی تشریح نہیں ہے، کیسے فیصلہ ہوگا کہ فیک نیوز کیا ہے؟ انھوں نے تنبیہہ کی جو متنازع قوانین کی بنیاد رکھتا ہے وہی اس کی زد میں آ جاتا ہے۔ چیئرمین کمیٹی کا کہنا تھا کہ میں خود بھی فیک نیوز کا متاثر رہا ہوں، فیک نیوز کے خلاف مقدمات کریں گے تو صرف وکیلوں کو ہی ادائیگیاں کرتے رہیں گے۔
گزشتہ روز پاکستان فیڈرل یونین آف جرنسلٹس (پی ایف یو جے) نے پیکا ایکٹ متنازع ترمیم کے خلاف کل ملک گیر احتجاج کی کال دے دی ہے۔
