باجوڑ میں تین روزہ بین الاضلاعی سپیشل پرسنزامن وہیل چیئر کرکٹ کپ ٹورنامنٹ کا انعقاد ہوا جس میں خصوصی کرکٹرز کی ٹیموں نے شرکت کی۔
اے آر وائی نیوز کے مطابق تین روزہ بین الاضلاعی اسپیشل پرسنز امن وہیل چیئر کرکٹ کپ ٹورنامنٹ کا فائنل میچ اور اختتامی تقریب باجوڑ اسپورٹس کمپلیکس میں منعقد ہوئی۔
اختتامی تقریب میں ضلعی انتظامیہ اور سیکیورٹی فورسز کے اعلی حکام، خصوصی افراد، آفیشلز اور اسپورٹس ایسوسی ایشن کے عہدیداران اور بڑی تعداد میں علاقہ کے نوجوانوں نے شرکت کی۔
تین روزہ ٹورنامنٹ میں دیر، باجوڑ، مردان، بنوں، سوات اور تخت بھائی کی خصوصی پرسنز کی ٹیموں نے حصہ لیا، ٹیموں کے مابین وہیل چیئر ریس اور ہینڈ ریسلنگ کے مقابلے بھی منعقد ہوئے۔
مہمان خصوصی نے اعلی کارکردگی دکھانے والے کھلاڑیوں اور رنراپ اور فاتح ٹیموں میں ٹرافیاں اور نقد انعامات تقسیم کیے، خصوصی افراد کیلئے میوزیکل نائٹ کا بھی اہتمام کیا گیا، میوزیکل نائٹ میں علاقائی فنکاروں نے فن کا مظاہرہ کیا۔
خصوصی افراد نے ٹورنامنٹ کے انعقاد پر فرنٹیئر کور نارتھ کا شکریہ ادا کرتے ہوئے کہا کہ اس طرح کے ٹورنامنٹ مستقبل میں بھی منعقد کئے جائیں تاکہ خصوصی افراد کی حوصلہ افزائی کی جا سکے۔
