واشنگٹن: وائٹ ہاؤس کے قریب 4 افراد پر آسمانی بجلی گر گئی، جس سے وہ شدید زخمی ہو گئے ہیں۔
تفصیلات کے مطابق امریکی حکام کا کہنا ہے کہ وائٹ ہاؤس کے قریب بجلی گرنے سے چار افراد کی حالت کی تشویش ناک ہے۔
فرانسیسی خبر رساں ادارے اے ایف پی کے مطابق واقعہ جمعرات کو وائٹ ہاؤس کے ایک قریبی پارک میں پیش آیا، زخمیوں میں 2 مرد اور 2 خواتین شامل ہیں جنھیں مقامی اسپتال منتقل کیا گیا ہے۔
سوشل میڈیا پر شیئر ویڈیوز میں دیکھا جا سکتا ہے کہ جائے وقوعہ پر متعدد ایمبولینسیں اور فائر بریگیڈ کی ایک گاڑی موجود تھی، جمعرات کی شام کو واشنگٹن میں گرج چمک کے ساتھ شدید طوفانی بارشیں بھی ہوئیں۔
WATCH: Fox weather camera captured this incredible lightning strike around the time the 4 people were struck near White House. https://t.co/9liRqW7tqx @fox5dc pic.twitter.com/fsXTKCpYQq
— Lindsay Watts (@LindsayAWatts) August 5, 2022
واشنگٹن کے فائر اینڈ ایمرجنسی ڈیپارٹمنٹ کے ترجمان ویتو میگیئلو نے بتایا کہ وائٹ ہاؤس کے سیکرٹ سروس کے افسران اور پارک پولیس کے اہل کاروں نے زخمیوں کو طبی امداد کی فراہمی کے لیے ایمرجنسی سروس سے رابطہ کیا تھا۔
انھوں نے کہا کہ یہ واضح نہیں کہ آیا یہ چاروں افراد ایک دوسرے کو جانتے تھے یا نہیں، ان کا مزید کہنا تھا کہ جب آسمانی بجلی گری تو یہ چار افراد ایک درخت کے قریب کھڑے تھے۔
ترجمان نے کہا کہ جب بادل اور آسمانی بجلی گرج رہے ہوں تو بہتر یہی ہوتا ہے کہ درختوں سے دور رہیں اور گھر کے اندر رہیں، اور یہی اصول ہے۔