لاہور : پاکستان پیپلزپارٹی نے اپنی سیاسی طاقت دکھانے کیلئے لاہور میں بڑا جلسہ کرنے کا فیصلہ کرلیا، شریک چیئرمین آصف زرداری نے فیصلے کی توثیق کردی۔
تفصیلات کے مطابق پاکستان پیپلز پارٹی کے شریک چیئرمین اور سابق صدر آصف علی زرداری نے لاہور میں بڑا عوامی جلسہ کرنے کا فیصلہ کرلیا، تاریخ کا اعلان جلد کیا جائے گا۔
پنجاب کی سیاست کے مرکز لاہور میں پیپلز پارٹی نے عوامی طاقت دکھانے کا ارادہ رکھتی ہے، اس سلسلے میں پارٹی کے مقامی رہنما کارکنان کے ہمراہ شہر کے مختلف علاقوں کے دورے کر رہے ہیں۔
اس حوالے سے ذرائع کا کہنا ہے کہ فی الحال جلسے کے مقام کا تعین نہیں ہوا ہے جلد فیصلہ کرلیا جائے گا، جلسے میں عوام، پارٹی کارکنان اور رہنما بڑی تعداد میں شریک ہوں گے۔
دوسری جانب سابق صدر آصف علی زرداری کی لاہور میں متحرک سیاست جاری ہے اور پارٹی میں مزید سیاسی رہنماؤں کی آمد کا سلسلہ بھی تھم نہ سکا ہے۔