ویتنام سے لائی گئی ٹریسا (ہتھنی) 65 سال کی عمر میں آسٹریلیا کے چڑیا گھر میں چل بسی۔
غیر ملکی خبررساں ادارے کی رپورٹ کے مطابق 1963 میں ویتنام سے لائی گئی ٹریسیا کی موت بدھ کی شام کو آسٹریلوی شہر پرتھ کے چڑیا گھر میں ہوئی۔
1963 میں ویتنام سے آنے کے بعد سے ٹریسیا پرتھ کے چڑیا گھر کا ایک خاص حصہ تھی۔
چڑیا گھر انتظامیہ نے ٹریسیا کی موت پر افسوس کا اظہار کرتے ہوئے کہا کہ 65 سالہ ہتھنی کو ہمیشہ اس کے پیار بھرے انداز کی وجہ سے یاد رکھا جائے گا۔
دوسری جانب ٹریسیا کے اعزاز میں، پرتھ کی چڑیا گھر انتظامیہ نے ٹریسیا ٹریبیوٹ ٹو کنزرویشن فنڈ قائم کیا ہے اور لوگوں کو تعزیت کے لیے پھول بھیجنے کے بجائے فنڈ میں عطیہ کرنے کی ترغیب دی جا رہی ہے۔
حکام کے مطابق فنڈ کی رقم چڑیا گھر کے دوسرے جانوروں کی صحت پر خرچ کی جائے گی۔
مغربی آسٹریلیا کے پریمیئر مارک میک گوون نے ٹریسیا کو خراج تحسین پیش کرتے ہوئے ایک بیان میں کہا کہ ‘ہم نے اپنے ایک آئیکن کو رخصت کردیا، ٹریسیا ہمارے لیے ایک گھریلو نام تھا’۔
رپورٹس کے مطابق ٹریسیا برش کی مدد سے رنگوں سے شاندار مصوری بھی کرتی تھی جسے بعد ازاں فروخت کر کے اس کی رقم عطیہ کردی جاتی تھی۔
ٹریسیا کی موت پر شہری بھی کافی اداس ہیں،انہوں نے اس ہتھنی کے ساتھ گزارے ہوئے لمحات کو بھی یاد کیا۔
