کراچی: پی ٹی آئی کے صدر پرویز الہیٰ کے ایم کیو ایم سے رابطے پر پی ٹی آئی کراچی قیادت نے تحفظات کا اظہار کردیا۔
اے آر وائی نیوز کے مطابق پی ٹی آئی اراکین قومی و صوبائی اسمبلی کا اجلاس آفتاب صدیقی کی سربراہی میں انصاف ہاؤس میں ہوا جس میں اراکین کی اکثریت سے ایم کیو ایم سے رابطہ نہ کرنے پر زور دیا ہے۔
ذرائع کا بتانا ہے کہ پی ٹی آئی ارکان نے کہا کہ پرویز الٰہی نے رابطہ کرلیا تھا تو بہتر ہوتا کہ کراچی قیادت کو اعتماد میں لیتے۔
ذرائع کے مطابق پی ٹی آئی کراچی قیادت نے شاہ محمود قریشی کو تحفظات سے آگاہ کردیا ہے۔
پی ٹی آئی ارکان کا کہنا ہے کہ ایم کیو ایم پی ڈی ایم کی اتحادی ہے ان سے ہاتھ نہیں ملا سکتے۔
ارکان اسمبلی کا کہنا تھا کہ انہیں ایم کیو ایم سے نہ کوئی مدد چاہیے نہ ہی وہ ان سے ملنا چاہتے ہیں، امکان ظاہر کیا جارہا ہے کہ پی ٹی آئی ارکان کے تحفظات کے بعد ایم کیو ایم سے مزید رابطے نہیں کیے جائیں گے۔
