پشاور: پولیس لائنز دھماکے میں ملوث خودکش حملہ آور کے اعضاء ڈی این اے ٹیسٹ کیلئے آج بھجوائیں جائیں گے۔
تفصیلات کے مطابق سانحہ پشاور کے بعد فضا سوگوار ہے، پولیس لائنزکی مسجد میں خودکش دھماکے کی تحقیقات جاری ہے۔
تحقیقاتی ادارے کی جانب سے آج مبینہ طور پر ملوث خود کش حملہ آور کے اعضاء ڈی این اے ٹیسٹ کیلئے بھجوائیں جائیں گے۔
تحقیقاتی ٹیموں نے پولیس لائنز کے تمام سٹاف کی پروفائلنگ بھی شروع کردی ہے، پولیس لائنز اور اطراف کی تمام سی سی ٹی وی فوٹیجز بھی حاصل کرلی گئی ہے۔
پولیس لائنز کے داخلی راستوں پر سیکورٹی انتہائی سخت کرکے اضافی نفری تعینات کردی گئی ہے۔
دوسری جانب پشاور پولیس لائنز دھماکے میں شہید ہونیوالی مسجد میں اذان کی صدا دوبارہ بلند کرنے اور نماز کی ادائیگی کیلئے پولیس اہلکاروں نے جزوی طور پر ملبہ ہٹانے کا کام شروع کردیا ہے۔
یاد رہے پولیس لائنزکی مسجد میں خودکش دھماکےمیں شہداء کی تعداد سوہوگئی ہے ، ترجمان لیڈی ریڈنگ اسپتال کے مطابق ترپن مریض زیرعلاج ہیں جس میں سات زخمی آئی سی یو میں ہیں۔
