خیبرپختونخوا کے دارالحکومت پشاور میں تھانہ ارمڑ کی حدود میں مسجد کی دیوار کے قریب آئی ای ڈی دھماکا سے متعلق اہم انکشاف ہوا ہے۔
گزشتہ روز خیبرپختونخوا کے دارالحکومت پشاور میں تھانہ ارمڑ کی حدود میں مسجد کی دیوار کے قریب آئی ای ڈی دھماکا ہوا تھا جس کے نتیجے میں مفتی منیر شاکر جاں بحق ہو گئے تھے۔
پولیس کے مطابق ارمڑ دھماکے سے متعلق پولیس کی تحقیقات جاری ہیں، دھماکے میں 600 گرام بارودی مواد استعمال ہوا اور بارودی مواد مسجد کے چھوٹے مخصوص گیٹ کے سامنے نصب تھا۔
پولیس کی ابتدائی تحقیقات کے مطابق مفتی منیر شاکر جیسے ہی اس گیٹ سے مسجد میں داخل ہوئے تو دھماکا ہوگیا۔
پشاور میں تھانہ ارمڑ کی حدود میں دھماکا، مفتی منیر شاکر جاں بحق
پولیس کا مزید کہنا ہے کہ جائے وقوعہ کے قریبی علاقوں کی سی سی ٹی فوٹیج حاصل کی جارہی ہے، واقعہ کی ذمہ داری ابھی تک کسی نے قبول نہیں کی۔
دوسری جانب دھماکے کا مقدمہ تھانہ سی ٹی ڈی میں درج کرلیا گیا، مقدمہ تھانہ ارمڑ کے ایس ایچ او کی مدعیت میں نامعلوم شدت پسندوں کے خلاف درج کیا گیا ہے۔
ایف آئی آر کے مطابق کہ مسجد کے باہر دھماکے کی اطلاع موصول ہونے پر پولیس پہنچی، پولیس پہنچی تو دھماکے میں مفتی شاکر سمیت 4 افراد زخمی ہوئے تھے، مفتی شاکر زخموں کی تاب نہ لاتے ہوئے لیڈی ریڈنگ اسپتال میں دم توڑ گئے۔
مقدمہ کے متن میں لکھا گیا کہ بارودی مواد مسجد کے مخصوص چھوٹے گیٹ کے سامنے رکھا گیا تھا، جیسے ہی مفتی شاکر مسجد میں داخل ہوئے دھماکا ہوگیا، واقعہ حالیہ دہشتگردی کی ایک کڑی ہے۔
