پشاور: پاکستان پیپلز پارٹی نے مرکز کے بعد کے پی حکومت کے خلاف بھی اہم ترین فیصلہ کیا ہے۔
تفصیلات کے مطابق پیپلز پارٹی کے صوبائی صدر نجم الدین خان نے مرکز کے بعد کے پی حکومت کو گرانے کا اعلان کردیا ہے، انہوں نے دعویٰ کیا کہ پی ٹی آئی کے45ایم پی ایز کی حمایت حاصل ہوگئی ہے، مرکز کےبعد صوبےمیں بھی جلد عدم اعتماد کی تحریک لائیں گے۔
صوبائی صدرپیپلزپارٹی نے کہا کہ عدم اعتماد سے متعلق تمام اپوزیشن متحد اور ایک پیج پر ہیں اور صوبائی حکومت کے خلاف تحریک عدم اعتماد کامیاب ہوگی ۔
انہوں نے سندھ ہاؤس پر حملوں کو بزدلانہ فعل قرار دیتے ہوئے کہا کہ سندھ ہاؤس پر حملے کرکےہمارے صبر کا امتحان نہ لیاجائے۔
انہوں نے اسلام آباد میں سندھ ہاؤس پر حملے پر ریاستی اداروں کی خاموشی کو افسوس ناک اور معنی خیز قرار دیا اور کہا کہ خدانخواستہ یہ خاموشی کسی بڑے طوفان کا پیش خیمہ ثابت ہوسکتی ہے۔
نجم الدین خان نے کہا کہ عدلیہ، مقننہ، انتظامیہ اور میڈیا کسی خاص جماعت کے آلہ کار بننے کے بجائے اپنی قومی اور پیشہ ورانہ ذمہ داریاں پوری کریں، اگر ذمہ دار افراد نشانہ عبرت نہ بنے تو جو آج سندھ کے ساتھ ہوا یہ کل ریاست کی کسی بھی اکائی کے ساتھ ہوسکتا ہے۔
