موسم سرما میں جسم کو غذائیت بخش پکوانوں کی ضرورت ہوتی ہے اور ایسے میں میٹھے کی اشتہا بھی بڑھ جاتی ہے۔
اس موسم میں ضروری ہے کہ ایسی غذائیں کھائی جائیں جو جسم کو چکنائی اور توانائی فراہم کریں۔
آج ہم آپ کو پیٹھے کا مزیدار حلوہ بنانے کی ترکیب بتا رہے ہیں جو لذیذ ہونے کے ساتھ ساتھ غذائیت بخش بھی ہے۔
اجزا
پیٹھا: 1 کلو
گھی: 250 ملی لیٹر
چینی: 250 گرام
کھویا: 100 گرام
سبز الائچی: 7 دانے
کیوڑہ: کھانے کے 2 چمچے
چاندی کے ورق: حسب ضرورت
ترکیب
پیٹھے کو چھیل کر کدو کش کر لیں اور ایک دیگچی میں ڈال کر چولہے پر چڑھا دیں، اسے ہلکی آنچ پر پکنے دیں۔
جب پیٹھا گل جائے اور پانی خشک ہو جائے تو چینی ڈال کر کفیگر سے ہلاتے جائیں۔
جب چینی کا پانی بھی خشک ہو جائے تو دیگچی کو چولہے سے نیچے اتار لیں۔
اب کسی دوسری دیگچی میں گھی ڈال کر چولہے پر چڑھا دیں اور اس میں الائچی کے دانے نکال کر ڈال دیں۔
گھی کڑ کڑا جائے تو اس میں پیٹھا ڈال دیں اور بھونیں۔
جب خوشبو آنے لگے اور پیٹھے کا رنگ بادامی ہو جائے تو کھویا ڈال دیں اور بھونتے جائیں۔
حلوہ گھی چھوڑ دے تو نیچے اتار لیں اور کیوڑہ ڈال کر ڈھکن بند کر دیں۔
پانچ منٹ بعد کھول کر چاندی کے ورق لگائیں اور گرما گرم سرو کریں۔