لاہور: معروف تجزیہ نگار اوریا مقبول جان کی بازیابی کے لیے درخواست دائر کردی گئی، جس میں کہا ہے کہ بغیر وارنٹ گرفتاری دکھائے انہیں پولیس اپنے ساتھ لے گئی ہے۔
تفصیلات کے مطابق لاہور ہائی کورٹ میں معروف تجزیہ نگار اوریا مقبول جان کی بازیابی کے لیے درخواست دائر کردی گئی۔
درخواست اوریامقبول جان کی اہلیہ نے بیرسٹر ردا نور کے توسط سے دائر کی ، درخواست میں آئی جی پنجاب کو فریق بنایا گیا ہے۔
درخواست میں موقف اختیار کیا گیا کہ اوریا مقبول جان مشہور تجزیہ کار اور صحافی ہیں، 12اور13مئی کی رات کو پولیس نے انکے گھر پر چھاپہ مارا اور بغیر وارنٹ گرفتاری دکھائے انہیں پولیس اپنے ساتھ لے گئی۔
درخواست میں کہا گیا کہ پولیس نے انہیں غیر قانونی طور پر اپنی حراست میں رکھا ہوا ہے،عدالت اوریا مقبول جان کو فوری طور پر پیش کر کے رہا کرنے کا حکم دے۔
یاد رہے لاہور میں صحافی اوریا مقبول جان کو ان کے گھر سے گرفتار کر لیا گیا تھا ، پولیس نے رات گئے اوریا مقبول جان کی رہائش گاہ پر چھاپا مار کر انھیں حراست میں لیا۔
