اسلام آباد : گاوی نے پاکستان کو فائزر کی کورونا ویکسین فراہمی سے آگاہ کردیا، فائزر کی کورونا ویکسین آئندہ ماہ پاکستان آنے کا امکان ہے۔
تفصیلات کے مطابق وزارت صحت کی جانب سے بیان میں کہا گیا ہے کہ امریکی ساختہ کورونا ویکسین پاکستان آئے گی، گاوی نےپاکستان کو فائزر کی کورونا ویکسین فراہمی سے آگاہ کردیا، پاکستان کو فائزر کورونا ویکسین کوویکس کےپلیٹ فارم سے ملے گی۔
ذرائع کا کہنا ہے کہ کوویکس پاکستان کوفائزرویکسین کی چندلاکھ خوراکیں فراہم کرےگا، پاکستان کوویکس رکن ہونے پر فائزر کورونا ویکسین لینے کا پابند ہے، فائزر کی کورونا ویکسین آئندہ ماہ پاکستان آنےکاامکان ہے۔
ذرائع کے مطابق پاکستان کو کوویکس سے کورونا ویکسین رواں ماہ ملنا شروع ہو گی، کوویکس پاکستان کو آسٹرازنکا اور فائزر کی کورونا ویکسین فراہم کرے گا۔
کوویکس پاکستان کی 20فیصد آبادی کو مفت ویکسین فراہم کر رہا ہے اور کوویکس نے پاکستان کو پہلے فیز میں 17 ملین ڈوزز فراہمی کا اعلان کیا ہے۔
خیال رہے معاون خصوصی ڈاکٹر فیصل کا کہنا تھا کہ 60 سال سے زائد العمر افراد کے لیے ایسٹرا زینیکا اور دیگر ویکسینز کا انتظار ہے، برطانوی کمپنی ایسٹرا زینیکا کی ویکسین اس مہینے میں پاکستان آ جائے گی۔
ڈاکٹر فیصل سلطان نے مزید کہا تھا کہ محدود مقدار میں فائزر کمپنی کی میسنجر آر این اے ویکسین بھی مارچ میں آجائے گی جبکہ روسی ویکسین اسپوٹنک بھی اسی سہ ماہی میں دستیاب ہونے کا امکان ہے جو بوڑھے افراد کو لگائی جاسکتی ہے۔
