اسلام آباد : پاکستان فیڈرل یونین آف جرنلسٹس (پی ایف یوجے) نے شہید صحافی جان محمد مہر کے قاتلوں کی گرفتاری کے لیے ٹارگٹڈ فوجی آپریشن کا مطالبہ کر دیا۔
تفصیلات کے مطابق پاکستان فیڈرل یونین آف جرنلسٹس (پی ایف یوجے) نے صدر پاکستان عارف علوی کو خط لکھا، جس میں جان محمد مہر کے قاتلوں کی گرفتاری کے لیے ٹارگٹڈ فوجی آپریشن کرنے کا مطالبہ کیا۔
پاکستان فیڈرل یونین آف جرنلسٹس کے سیکریٹری فنانس لالا اسد پٹھان نے بتایا کہ پی ایف یو جے نے صدر پاکستان کو خط لکھ کر آگاہ کیا ہے کہ شہید جان محمد مہر کے قتل کو 11 روز گزر چکے ہیں لیکن پولیس قاتلوں کو ابھی تک گرفتار نہیں کر سکی۔
رہنماپی ایف یوجے کا کہنا تھا کہ پولیس کے مطابق شہید جان محمد مہر قتل کے ماسٹر مائنڈ اور سہولت کار کچے کے علاقے میں چھپے ہوئے ہیں اور کچے کے علاقے میں فی الوقت پولیس کا پہنچنا مشکل ہے۔
لالا اسد پٹھان نے کہا کہ صدر پاکستان کو خط لکھ کر گزارش کی گئی ہے کہ شہید جان محمد مھر کے قتل میں ملوث عناصر کی گرفتاری کے لیے فوج کو ٹارگٹڈ آپریشن کا حکم جاری کریں۔
خط میں صدر مملکت کو آگاہ کیا گیا ہے کہ جان محمد مہر کو 13 اگست کی رات کو سرعام گولیاں مار کر شہید کر دیا گیا تھا، وہ سکھر پریس کلب اور یونین آف جرنلسٹس کے سابق صدر بھی رہ چکے ہیں جبکہ وہ سینئر صحافی و اینکر پرسن اور کے ٹی این نیوز اور ڈیلی کاوش کے سکھر میں بیوروچیف مقرر تھے۔
