کراچی: شہر قائد میں مبینہ طور پر ایک نوجوان موٹر سائیکل لفٹر لڑکی سامنے آ گئی ہے، جسے پولیس نے گرفتار کر کے وہیکل لفٹنگ سیل کے حوالے کر دیا ہے، جہاں اس سے تفتیش کی جا رہی ہے۔
تفصیلات کے مطابق پولیس نے دعویٰ کیا ہے کہ 17 سالہ گرفتار لڑکی ثمرین عرف مشا اسٹریٹ کرائم کے بعد موٹر سائیکل لفٹنگ میں بھی ملوث نکلی ہے، اتحاد ٹاؤن سے گرفتار ہونے والی مبینہ چور لڑکی سے تفتیش کا عمل جاری ہے۔
پولیس حکام کا کہنا ہے کہ لڑکی موچکو کی رہائشی ہے، پولیس نے اسے اتحاد ٹاؤن سے حراست میں لیا، جب کہ ملزمہ سے برآمد موٹر سائیکل درخشاں سے چوری ہوئی تھی۔
دوسری طرف ثمرین نے بیان دیا ہے کہ ’’مجھے موٹر سائیکل چلانے کے لیے کسی نے دی تھی، مجھے نہیں معلوم موٹر سائیکل چوری کی ہے یا اس پر جعلی نمبر لگا ہے۔‘‘
پولیس حکام کا کہنا ہے کہ ملزمہ لڑکوں کا روپ اختیار کر کے مختلف علاقوں سے موٹر سائیکلیں چوری کرتی ہے، اور چوری شدہ موٹر سائیکل ساتھیوں کے ہمراہ حب چوکی بلوچستان میں فروخت کرتی ہے۔
پولیس حکام نے ملزمہ کے جرائم پیشہ ہونے اور پہلے بھی گرفتار ہونے کا شبہ ظاہر کیا ہے، ملزمہ کو پولیس نے عدالت میں بھی پیش کیا۔
گزشتہ روز ایس ایس پی کیماڑی نے بتایا کہ خفیہ اطلاع پر ایس ایچ او تھانہ اتحاد ٹاؤن سب انسپکٹر غلام رسول ارباب نے ٹیم کے ہمراہ کارروائی کرتے ہوئے ملزمہ کو اتحاد ٹاؤن سے گرفتار کیا، لڑکی کی شناخت ثمرین عرف مشا ولد عاشق حسین کے نام سے ہوئی۔
ایس ایس پی فدا حسین جانوری کے مطابق ملزمہ لڑکوں کا روپ دھار کر مختلف علاقوں سے موٹر سائیکلیں چوری کر کے حب چوکی بلوچستان میں فروخت کرتی تھی، ملزمہ کے قبضہ سے بہ وقت گرفتاری سرقہ شدہ موٹر سائیکل نمبر KPJ-7221 برآمد ہوئی، جو تھانہ درخشاں کے مقدمہ الزام نمبر 99/23 بجرم دفعہ 381A کی مال مسروقہ ہے۔
