کراچی : پی آئی اے انتظامیہ نے لاہور میں بوئنگ 777 اور ایئر بس اے320 طیاروں کا چیک اے کامیابی سے مکمل کرنے پر اس پراجیکٹ میں شامل انجینئرز اور ٹیکنیشنز میں تعریفی اسناد تقسیم کرنے کے لئے لاہور ایئر پورٹ پر ایک تقریب کا انعقاد کیا گیا۔
تقریب کے مہمان خصوصی سی ای او پی آئی اے کے مشیر ایئر وائس مارشل نور عباس نے تعریفی اسناد تقسیم کیں۔ اس موقع پر اپنے خیالات کا اظہار کرتے ہوئے ایئر وائس مارشل نور عباس نے کہا کہ پی آئی اے انجینئرنگ کا ایوی ایشن کی صنعت میں نمایاں مقام اوراہمیت ہے۔
انہوں نے کہا کہ لاہور میں طیاروں کی چیک اے کی سہولت سے پی آئی اے کو انجینئرنگ کی مد میں اضافی اخراجات کی قابل ذکر بچت ہو گی۔
شعبہ انجینئرنگ کاپی آئی اے کی ترقی میں کلیدی کردار ہے اور ہمیں فخر ہے کہ ہماری قابل افرادی قوت طیاروں کو قابل پرواز رکھنے میں اپنا بھر پور کردار ادا کر رہی ہے۔
پی آئی اے انجینئرنگ اس خطے میں طویل عرصے سے ملکی اور غیر ملکی ائر لائنوں کو اپنی خدمات فراہم کر رہی ہے جس سے ائر لائن کو خاطر خواہ ریونیو حاصل ہوتا ہے۔
نورعباس نے کہا کہ شعبہ انجینئرنگ کی خدمات سے لاہور ایئر پورٹ پر پی آئی اے کے علاوہ غیر ملکی ائر لائنوں کی ہفتہ وار50 پروازوں بھی استفادہ حاصل کر رہی ہیں۔
جن میں سعودیہ ایئر لائن، قطر ائر ویز اور اومان ائر شامل ہیں جبکہ مزید ایئر لائنوں کو خدمات فراہم کرنے کے لئے بات چیت جاری ہے۔ تقریب میں چیک اے میں حصہ لینے والے انجینئرز اور ٹیکنیشنز میں تعریفی اسناد تقسیم کی گئیں۔
تقریب میں چیف ٹیکنیکل آفیسر عامرعلی،ڈپٹی چیف انجینئر لاہور سہیل شبیر، ڈسٹرکٹ مینیجر سلیم اللہ شاہانی، سٹیشن مینیجر علی اصغر زیدی، منیجر پبلک ریلشنز اطہراعوان، ٹکٹ آفس مینیجر تنویر قاسم اور ڈپٹی سٹیشن مینیجر سہیل محمود نے بھی شرکت کی۔
