اسلام آباد : یوکرین میں پھنسنے والے پاکستانی شہریوں کو وطن واپس لانے کے لیے خصوصی چارٹرڈ طیارہ پولینڈ پہنچ گیا۔
اس حوالکے سے ذرائع کا کہنا ہے کہ پی آئی اے کا بوئنگ 777 طیارہ یوکرین میں پھنسے پاکستانیوں کو لینے کیلئے آج صبح روانہ ہوا تھا۔
پی کے7787 لاہور سے صبح23۔7 پرپولینڈ کے دارالحکومت وارسا کیلئے روانہ ہوا، طیارے نے وارسا کے مقامی وقت کے مطابق صبح 10 بجے لینڈنگ کی۔
ذرائع کے مطابق طیارہ 300 سے زائد پاکستانیوں کو لے کر وطن واپس پہنچے گا، طیارے کی پاکستان میں لینڈنگ اسلام آباد ایئر پورٹ پر ہوگی۔
ترجمان پی آئی اے عبدللہ خان نے اے آر وائی نیوز کے نمائندے کو بتایا کہ طیارہ وزارت خارجہ کی اجازت پر روانہ کیا گیا ہے، حکومت پاکستان کی ہدایات پر مزید پروازیں بھی آپریٹ کی جائیں گی۔
ترجمان دفتر خارجہ کا کہنا ہے کہ یوکرین میں سات ہزار پاکستانی موجود تھے جن میں تین ہزار طالب علم اور چار ہزار شہری شامل تھے ترجمان کے مطابق زیادہ تر شہری 24 فروری کو سفارتخانے کے کہنے پر یوکرین چھوڑ چکے ہیں۔
دفتر خارجہ نے گزشتہ روز بتایا تھاکہ 1525 پاکستانیوں کو یوکرین سے ہنگری، پولینڈ، رومانیہ منتقل کیا جاچکا ہے، پی آئی اے کا طیارہ صبح روانہ ہوگا اور اسی روز شام تک واپس آجائے گا۔
خیال رہے کہ گزشتہ دنوں یوکرین میں پھنسے پاکستانی شہریوں اور طلبا کی واپسی کے لیے آپریشن تیار کیا گیا تھا، سی ای او پی آئی اے ارشد ملک اور یوکرین میں پاکستانی سفیر کے درمیان رابطہ ہوا تھاجس میں یوکرین میں پھنسے پاکستانی شہریوں کی محفوظ مقام پر منتقلی اور وطن واپسی سے متعلق گفتگو کی گئی تھی۔
