کراچی : قومی ایئر لائن ( پی آئی اے ) کا طیارہ بڑے حادثے سے بچ گیا تاہم طیارے کو اڑان بھرنے کے 50 منٹ بعد ایمرجنسی لینڈنگ کرنا پڑی۔
تفصیلات کے مطابق قومی ایئر لائن پی آئی اے کی دبئی سے پشاور آنے والی پرواز میں اڑان بھرتے ہی فنی خرابی پیدا ہوگئی ، جس کے بعد طیارے نے واپس ایمرجنسی لینڈنگ کی۔
ایوی ایشن ذرائع نے بتایا کہ پروازپی کے 284 میں روانگی کے فوری بعدخرابی پیداہوئی، ایئرٹریفک کنٹرولر دبئی کی ہدایت پر طیارے نے 50 منٹ بعد واپس لینڈنگ کی۔
مسافروں کو طیارے سےاتارکر لاونج منتقل کردیا گیا ہے ، ایئر بس اے 320 طیارے کا معائنہ کیا جارہا ہے۔
ترجمان قومی ایئر لائن نے بتایا پرواز پی کے 284 نے آج صبح 9 بجے پشاور پہنچنا تھا تاہم دبئی ایئرپورٹ پر طیارے کی فنی خرابی دور کی جا رہی ہے۔
ترجمان کا کہنا ہے کہ پی آئی اے کی پرواز پی کے 284دبئی سے ایک گھنٹے بعد پشاور روانہ ہوگی۔
