کراچی : پی آئی اے کی جانب سے ملک کے تمام ڈاکٹرز اور پیرامیڈکل اسٹاف کو خراج تحسین پیش کرنے کیلئے عید سے پہلے اور عید کے دوران پروازوں پر خصوصی دس فیصد رعایت دینے کا اعلان کیا ہے۔
اس حوالے سے سی ای او پی آئی اے ائیر مارشل ارشد ملک نے ہدایات جاری کی ہے کہ کرونا وائرس کے دورانڈاکٹرز اور پیرامیڈکل اسٹاف کی لازوال خدمات پر انہیں خصوصی رعایت فراہم کی جائے اس سلسلے میں پی آئی اے کی جانب سے عید الفطر کے موقع پر پروازوں پر ٹکٹس میں خصوصی طور پر دس فیصد رعایت دی جائے گی۔
ائیر مارشل ارشد ملک کا کہنا تھا کہ اس وقت انسانیت ایک بدترین بحران سے گزر رہی ہے اور اس جنگی صورتحال میں ڈاکٹرز اور پیرامیڈکل اسٹاف صف اول پر کھڑے ہوکر لڑ رہے ہیں۔
انہوں نے کہا کہ رعایت کا مقصد پی آئی اے کی جانب سے تمام ڈاکٹرز اور پیرا میڈکل اسٹاف کی خدمات اور انسانیت کی خاطر قربانیوں کا اعتراف ہے۔
واضح رہے کہ رعائتی ٹکٹ پی آئی اے کے دفاتر سے پی ایم ڈی سی کا جاری کردہ کارڈ دکھانے پر حاصل کئے جاسکتے ہیں۔
