لاہور: قومی ایئرلائن (پی آئی اے) کے عملے کیلیے مامور ایک اور گاڑی حادثے کا شکار ہوگئی جس کے نتیجے میں دو فضائی میزبان شدید زخمی ہوگئیں۔
اے آر وائی نیوز کے مطابق پانچ روز کے دوران پی آئی اے عملے کے ڈراپ پر مامور دوسری گاڑی کو حادثہ پیش آیا ہے، یہ حادثہ آج لاہور ائرپورٹ کی پارکنگ سے نکلتے ہوئے پیش آیا۔
جدہ سے آنے والی حج پرواز کی 2 فضائی میزبانوں کو ایئرلائن کی گاڑی ہوٹل ڈراپ کرنے جا رہی تھی، پارکنگ سے تیز رفتاری کے ساتھ نکلنے والی کار نے دوسری گاڑی کو ٹکر مار دی۔
تیز رفتار ٹکر کے باعث گاڑی کے ائربیگز کھل گئے جبکہ فضائی میزبانوں کو شدید چوٹیں آئیں فائزہ اور حمیرا نامی میزبانوں کو ایمبولینس کے ذریعے اسپتال منتقل کیا گیا۔
آج سے تین روز قبل بھی لاہور سے سیالکوٹ جاتے ہوئے فضائی میزبانوں کی گاڑی تیز رفتاری کے باعث ٹرک سے ٹکراگئی تھی، حادثے میں شدید زخمی فضائی میزبانوں میں سے ایک کی حالت تاحال تشویشناک ہے۔
