تمام پھلوں کی طرح آلو بخارا ایک لذیذ اور ذائقہ دار پھل ہے جس کی افادیت سے اکثر لوگ واقف نہیں ہیں۔ آلو بخارے کے بے شمار طبی فوائد ہیں جو بیمار افراد کے لیے دوا کا کام کرسکتا ہے۔
مذکورہ پھل سرخی مائل ، سیاہ اور ذائقے میں چاشنی دار ہوتا ہے لیکن کیا آپ خشک آلو بخاروں کی طبی فائدوں سے واقف ہیں؟
طبی ماہرین کا کہنا ہے کہ اگر اسے خشک کر کے استعمال کیا جائے تو یہ ہڈیوں کی مضبوطی سمیت کئی طرح کے کینسر بالخصوص بڑی آنت کے کینسر کے لیے بہت مفید ثابت ہوتا ہے، خشک آلو بخارے میں آئرن ، پوٹاشیم، وٹا من اور فائبر موجود ہوتا ہے۔
ہڈیوں کے لیے مفید
خشک آلو بخارے ہڈیوں کی صحت بہتر بنانے کے لیے فائدہ مند ہیں۔ کچھ تحقیقی رپورٹس میں خشک آلو بخارے کھانے کی عادت ہڈیوں کے مختلف امراض جیسے ہڈیوں کی کمزوری اور بھربھرے پن کا خطرہ کم کرنے میں مددگار قرار دی گئی ہے۔
دلچسپ بات یہ ہے کہ طبی ماہرین مکمل طور پر نہیں جانتے کہ ہڈیوں کی صحت کے لیے خشک آلو بخارے اتنے مفید کیوں ہیں، تاہم ان کے خیال میں اینٹی آکسائیڈنٹس اور ورم میں کمی لانے والی خصوصیات اس حوالے سے کردار ادا کرتی ہیں۔
تحقیق سے یہ بھی عندیہ ملا ہے کہ اس پھل سے ہڈیوں کو بنانے کے عمل میں شامل مخصوص ہارمونز کی سطح میں اضافہ ہوتا ہے۔
اس میں موجود وٹامن کے، فاسفورس، میگنیشم اور پوٹاشیم بھی ہڈیوں کی صحت کے لیے مفید اجزاء سمجھے جاتے ہیں۔
ایک حالیہ تحقیقی رپورٹس میں دریافت کیا گیا کہ روزانہ خشک آلو بخارے کھانے سے ہڈیوں کی کمزوری اور حجم میں کمی کی روک تھام ممکن ہوسکتی ہے۔ خشک آلوبخارے میں کئی وٹامنز اور منرلز پائے جاتے ہیں جو ہڈیوں کے لیے مفید ہوتے ہیں۔
نظام ہاضمہ
کھانے کے بعد اسے ہضم کرنے میں وقت لگتا ہے تو خشک آلو بخارے کو معمول بنا لیں۔ جی ہاں نظام ہاضمہ صحت مند بنائےخشک آلو بخاروں میں موجود فائبر قبض سے نجات دلانے یا اس سے بچانے میں مدد فراہم کرتا ہے۔
خشکی کو دور کرتا ہے
آلو بخارا میں موجود وٹامن سی آپ کی خشکی کو ختم کرنے میں مدد کرتا ہے۔ یہ پھل کھوپڑی کے بیکٹیریا سے لڑنے میں مدد کر سکتے ہیں اور خشکی سے بچنے کے لیے جلد کو سکون بخشنے کا باعث بنتا ہے۔
آئرن کی کمی پورا کرے
خشک آلو بخارے کا جوس جسم میں آئرن کی کمی کو دورکرنے میں مدد دیتا ہے، جسم میں خون کی کمی اس وقت ہوتی ہے جب خون کے صحت مند سرخ خلیات کی مقدار کم ہوجائے، جن کے بننے کے لیے آئرن اہم جز ہے۔
خشک آلو بخارے کا جوس آئرن کے حصول کا اچھا ذریعہ ہے اور اس کی کمی بھی دور کرتا ہے جس سے خون کی کمی سے بچنے میں مدد ملتی ہے۔
