اسلام آباد: وزیر اعظم آزاد کشمیر نے عوامی ایکشن کمیٹی کو مذاکرات کی دعوت دے دی ہے۔
تفصیلات کے مطابق آٹے اور بجلی کی قیمتوں میں اضافے پر آزاد کشمیر کے عوام سراپا احتجاج بن گئے ہیں، اور عوامی ایکشن کمیٹی نے لانگ مارچ کا اعلان کر دیا ہے۔
رات گئے اسلام آباد میں وزیر اعظم آزاد کشمیر چوہدری انوارالحق نے پریس کانفرنس کرتے ہوئے کہا کہ سیاسی حکومت بات چیت کے ذریعے معاملات حل کرتی ہے، حکومت نے یقینی بنایا احتجاج کے دوران طاقت کا استعمال نہ ہو۔
گزشتہ روز میرپور میں مظاہرین اور پولیس میں تصادم سے سب انسپکٹر عدنان قریشی گولیاں لگنے سے جاں بحق ہو گئے تھے جب کہ تین مظاہرین بھی زخمی ہوئے تھے۔
واضح رہے کہ آٹے اور بجلی کی قیمتوں میں کمی کے لیے عوامی ایکشن کمیٹی کے لانگ مارچ کے اعلان پر مختلف شہروں کے تمام راستوں پر پولیس کی بھاری نفری تعینات کی گئی ہے۔ دوسری جانب عوامی احتجاج میں شدت آ گئی ہے، اور احتجاجی قافلوں کی مظفر آباد کی جانب پیش قدمی جاری ہے، مظاہرین نے جگہ جگہ انتظامیہ کی طرف سے لگائی گئی رکاوٹیں ہٹا دیں، انتظامیہ نے سڑکیں بند کرنے کے لیے قیمتی درخت بھی کاٹ کر گرائے۔
