اسلام آباد: وزیرِ اعظم شہباز شریف نے آئندہ مالی سال کے بجٹ پر اجلاس آج جاتی امرا میں طلب کر لیا، جس میں شہریوں کو ریلیف دینے کے لیے بجٹ میں اقدامات کے احکامات دیئے جائیں گے۔
تفصیلات کے مطابق وزیر اعظم شہباز شریف نے آئندہ مالی سال کے بجٹ پر اہم اجلاس آج طلب کرلیا، شہباز شریف کی زیر صدارت اجلاس جاتی عمرہ میں بلایا گیا ہے۔
حکومتی معاشی ٹیم کو اجلاس میں شرکت کی ہدایت کردی گئی ہے ، اجلاس میں آئندہ مالی سال کی بجٹ تجاویز کا جائزہ لیا جائے گا، معاشی ٹیم وزیر اعظم کو بجٹ تجاویز پر بریفنگ دے گی۔
وزیراعظم حکومتی معاشی ٹیم کو بجٹ سے متعلق اہم ہدایات جاری کریں گے، جس میں شہریوں کو ریلیف دینے کے لیے بجٹ میں اقدامات کے احکامات دیں گے۔
اجلاس میں وزیر خزانہ محمد اورنگزیب،وزیر پیٹرولیم مصدق ملک،وزیر پاور اویس لغاری اور وفاقی وزیر اقتصادی امور احد چیمہ شرکت کریں گے جبکہ وزیر خارجہ اسحاق ڈار کی شرکت بھی متوقع ہے۔
اس کے علاوہ وزیرتجارت جام کمال اوروزیر صنعت و پیداوار رانا تنویر حسین سمیت دیگر متعلقہ حکام بھی اجلاس میں شریک ہوں گے۔
یاد رہے آئی ایم ایف نے وفاقی بجٹ 2024-25 کے اہداف کا جائزہ لیا اور کہا ہے کہ آئندہ مالی سال پاکستان کی درآمدات میں پانچ ارب اکیاون کروڑ سترلاکھ ڈالرزاضافےکا تخمینہ ہے اور برآمدات میں ایک ارب پینتیس کروڑ بیس لاکھ ڈالرزاضافےکا امکان ہے۔
آئی ایم ایف نے نئے مالی سال درآمدات کاحجم ساٹھ ارب اڑتالیس کروڑ ڈالرز ، جبکہ برآمدات بتیس ارب چھپن کروڑ ڈالرز رہنے کا تخمینہ دیا ہے۔
آئندہ بجٹ میں سنگل سیلز ٹیکس ریٹرن متعارف کرانے کا فیصلہ کیا ہے، ذرائع کے مطابق نان فائلر کاروباری افراد کی سپلائی مانیٹرنگ کی جائے گی جبکہ ٹائلز سیکٹرمیں ٹریک اینڈ ٹریس سسٹم لگانے کی تجویز ہے اور پوائنٹ آف سیلزمیں ایف بی آرکی ہر رسید پر فیس بڑھانے کا امکان ہے۔
