اسلام آباد : وزیراعظم نوازشریف نے فرانس کے شہر نیس میں حملے کی شدید الفاظ میں مذمت کی ہے، وزیراعظم نےحملے میں قیمتی انسانی جانوں کے ضیاع پر دکھ اور افسوس کا اظہار کیا ہے۔
تفصیلات کے مطابق وزیر اعظم نوازشریف نے فرانس کے شہر نیس میں حملے کی مذمت کرتے ہوئے کہا کہ ہمارےجذبات اوردعائیں متاثرہ خاندانوں کے ساتھ ہیں، وزیراعظم نوازشریف نے فرانس حملے میں زخمی ہونے والوں کی جلد صحتیابی کی دعا کی۔
وزیراعظم نے کہا کہ پاکستان نے دہشتگردی کے خلاف ہر اول ملک کی حیثیت سے بہت نقصانات اٹھائے، فرانس کا دکھ محسوس کرسکتے ہیں، پاکستان ہرقسم کی دہشت گردی کی مذمت کرتا ہے۔
انکا مزید کہنا تھا کہ پاکستان کے عوام اور حکومت حملے پر افسردہ ہیں، دکھ کی اس گھڑی میں فرانس کی حکومت اور عوام کے ساتھ ہیں۔
یاد رہے کہ فرانس کے ساحلی شہر نیس میں تیزرفتار ٹرک قومی دن کی تقریب کےدوران شرکا پر چڑھ دوڑا، جس کے نتیجے میں 80 افراد ہلاک جبکہ 120 زخمی ہوگئے جبکہ متعدد زخمیوں کی حالت تشویشناک ہے۔