اسلام آباد : وزیراعظم شہباز شریف کا کہنا ہے کہ معیشت کا پہیہ جام کرنے کا نعرہ لگانے والوں کے دعوے دھرے کے دھرے رہ گئے، پاکستان معاشی استحکام کے بعد معاشی ترقی کے راہ پر گامزن ہو چکا ہے۔
تفصیلات کے مطابق وزیراعظم شہباز شریف نے ترسیلات زر میں ریکارڈ اضافے پر قوم کو مبارکباد دیتے ہوئے کہا کہ دسمبر 2023 سے دسمبر 2024 تک ترسیلات زر میں 29.3 فیصد کا اضافہ ہوا ہے، دسمبر 2024 تک 3.1 بلین ڈالر ترسیلات زر وصول ہوئیں ، جو نومبر 2024 کے مقابلے میں 5.6 فیصد زیادہ ہے۔
،وزیراعظم کا کہنا تھا کہ ریکارڈ ترسیلات زر پاکستانیوں کے ملک وقوم کی ترقی میں کردار ادا کرنے کے آہنی عزم کی سند ہے، معیشت کا پہیہ جام کرنے کا نعرہ لگانے والوں کے دعوے دھرے کے دھرے رہ گئے ہیں۔
پاکستان معاشی استحکام کے بعد معاشی ترقی کے راہ پر گامزن ہو چکا ہے اور حکومت پاکستان ملکی ترقی اور عوامی فلاح و بہبود کے لیے پر عزم ہے۔
خیال رہے پاکستان کی ترسیلات زر میں مسلسل اضافہ ہورہا ہے۔ دسمبر دو ہزارچوبیس میں ترسیلات زر کی مد میں تین ارب دس کروڑ ڈالر موصول ہوئے۔ جو دسمبر دو ہزار تئیس کے مقابلے میں انتیس فیصد جبکہ نومبر دو ہزار چوبیس کے مقابلے میں چھ فیصد زائد ہیں۔
رواں مالی سال جولائی تا دسمبر تینتیس فیصد اضافے سے سترہ ارب چوراسی کروڑ ڈالر کی ترسیلات زر موصول ہوئیں، دسمبر 2024 میں سعودی عرب سے سب سے زیادہ ستتر کروڑ چھ لاکھ ڈالر کی ترسیلاتِ زر موصول ہوئیں۔
اس کے علاوہ یواے ای سے تریسٹھ کروڑ پندرہ لاکھ ڈالر، برطانیہ پینتالیس کروڑ انسٹھ لاکھ اور امریکا سے اٹھائیس کروڑ تینتالیس لاکھ ڈالر موصول ہوئی۔
