اسلام آباد : وزیراعظم عمران خان نے حکومتی اقتصادی پالیسی پر مختلف طبقات کو اعتماد میں لینے کا فیصلہ کرلیا ہے جبکہ وزیراعظم کا قوم سے خطاب بھی متوقع ہے۔
تفصیلات کے مطابق وزیراعظم عمران خان نے حکومتی اقتصادی پالیسی پر مختلف طبقات کو اعتماد میں لینے کا فیصلہ کیا ہے ، وزیراعظم اتوار کو سینئر صحافیوں اور تاجر برادری کے نمائندہ وفد سے ملاقات کریں گے۔
ذرائع کے مطابق آئی ایم ایف کے ساتھ مذاکرات پر وزیراعظم کا قوم سے خطاب بھی زیرغور ہے، قوم سے خطاب کا حتمی فیصلہ عمران خان خود کریں گے۔
واضح رہے کہ انٹر بینک میں ملک کی معاشی صورت حال اور آئی ایم ایف سے رجوع کرنے، ڈالر کی قیمت میں تاریخی اضافہ اور سی این جی کی قیمتوں میں اضافے پر حکومت اپوزیشن کی جانب سے شدید تنقید کا نشانہ بنایا جارہا ہے۔
گزشتہ روز اسی تناظر میں یہ خبر سامنے آئی کہ وزیر اعظم وفاقی کابینہ میں شامل اسد عمر سے ناخوش ہیں، البتہ وزیر اعظم ہاؤس کی جانب سے اس کی تردید کردی تھی۔
یاد رہے حکومت نے آئی ایم ایف قرضے کے لیے آئی ایم ایف سے باضابطہ درخواست بھی کرچکی ہے۔
خیال رہے چند روز قبل پی ٹی آئی کی حکومت نے ملکی معیشت کو استحکام بخشنے کے لیے آئی ایم ایف سے رجوع کرنے کا اعلان کیا تھا، اس ضمن میں وزیر خزانہ اسد عمر نے ایک بیان میں کہا تھا کہ ملک مشکل حالات سے گزر رہا ہے، آئی ایم ایف سے ایسا پروگرام لینا چاہتے ہیں، جس سے معاشی بحران پر قابو پایا جا سکے۔
