کراچی: وزیر اعظم عمران خان سے تاجروں اور صنعت کاروں کی ملاقات کی اندرونی کہانی سامنے آ گئی، گورنر سندھ کو تاجروں کے مسائل کے حل کے لیے اقدامات کرنے کا ٹاسک دے دیا گیا۔
تفصیلات کے مطابق کراچی میں گزشتہ روز وزیر اعظم عمران خان سے ملاقات میں تاجروں نے مسائل کا پنڈورا باکس کھول کر رکھ دیا، تاجر رہنماؤں کا کہنا تھا کہ کراچی معاشی حب ہے لیکن ہمیں ہزاروں مسائل کا سامنا ہے، گیس بحران سے اربوں روپے کے آرڈر وقت پر نہیں دیے جا سکے، تاجر کیا کریں۔
تاجر رہنماؤں نے شکایت کی کہ سوئی سدرن گیس انتظامیہ کی وجہ سے کراچی کی صنعتیں تباہ ہوگئیں، حکومت کی معاشی ٹیم آپ کے احکامات پر عمل نہیں کرتی، ایف بی آر کا رویہ پہلے کی طرح تاجر دشمن ہے۔
یہ بھی پڑھیں: بزنس کمیونٹی کو آرڈیننس کے ذریعے نیب سے الگ کردیا، وزیراعظم
تاجروں نے وزیر اعظم سے مطالبہ کیا کہ ٹیکس نظام کو بہتر کیا جائے۔ چیئرمین ایف بی آر شبر زیدی نے کہا کہ ایف بی آر افسران کی مداخلت کو کم کرنے کی حکمت عملی اپنائی ہے، ریٹیلرز پر بغیر دباؤ ٹیکس کی ادائیگی کا نظام وضع کر لیا گیا ہے، پوائنٹ آف سیلز سسٹم، ایف بی آر، ریٹیلرز دونوں کی جیت ہے۔
دریں اثنا، تاجروں اور صنعت کاروں کی شکایات سن کر وزیر اعظم عمران خان نے ان کے مسائل کے حل کی یقین دہانی کراتے ہوئے گورنر سندھ عمران اسماعیل کو اقدامات کرنے کا ٹاسک دے دیا۔
