اسلام آباد: وزیراعظم عمران خان آج قوم سے خطاب میں کیا اعلان کرنے والے ہیں؟ وزیر دفاع پرویزخٹک نے بتادیا۔
اے آر وائی نیوز کے مطابق وزیر دفاع پرویزخٹک نے نوشہرہ میں خطاب کرتے ہوئے دعویٰ کیا کہ وزیراعظم آج اپنے خطاب میں پیٹرول فی لیٹر 10 روپے سستا کرنے کا اعلان کرینگے جبکہ بجلی کے فی یونٹ پر 5 روپے کمی کی جارہی ہے۔
وزیر دفاع نے کہا کہ وزیراعظم کے خطاب میں بے روزگار بی اے پاس افراد کو ماہانہ 20 ہزار روپے دینے کا بھی اعلان کیا جائے گا۔
دوسری جانب وزیراعظم عمران خان کی زیر صدارت معاشی ٹیم کا اہم اجلاس جاری ہے، اجلاس میں اطلاعات و نشریات اور معاشی ٹیم کےذمہ داران شریک ہیں۔
اجلاس میں وزیراعظم قوم سےخطاب کےممکنہ نکات پر مشاورت جاری رکھے ہوئے ہیں، اجلاس میں وزیراعظم کے خطاب کو حتمی شکل دی جا رہی ہے۔
یہ بھی پڑھیں: وفاقی کابینہ کا کل ہونے والا اجلاس ‘اچانک’ ملتوی کردیا گیا
ادھر وزیراعلیٰ خیبرپختونخوا محمود خان بھی پر امید ہے کہ وزیراعظم بہت جلد قوم کو خوشخبری سنائیں گے۔
انہوں نے کہا کہ ہمیں ورثے میں جو مسائل ملے انہیں ترجیحی بنیادوں پر حل کیا جارہا ہے، وفاقی حکومت کی جانب سے نیا پاکستان کارڈ لایا جارہا ہے۔
محمود خان کا کہنا تھا کہ عالمی مارکیٹ میں چیزیں مہنگی ہونے کی وجہ سے یہاں بھی اس کا اثر ہوتا ہے، سب چیزیں باہر سے آرہی ہیں تو یقیناً مہنگائی ہوگی۔
