اسلام آباد: وزیراعظم عمران خان نے کراچی ٹرانسفارمیشن پلان پرجمعرات کو اعلیٰ سطح کا اجلاس بلانے کی ہدایت کردی، امین الحق نے کراچی ٹرانسفارمیشن پلان پرسست روی کا معاملہ اٹھایا تھا۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ہوا، جس میں 14 نکاتی ایجنڈے پرغورمتعدد کی منظوری دے دی گئی ، اجلاس میں امین الحق نے کراچی ٹرانسفارمیشن پلان پر سست روی کا معاملہ اٹھایا۔
وفاقی وزیر امین الحق نے کہا کہ کراچی ٹرانسفارمیشن پلان پر خصوصی توجہ کی ضرورت ہے ، وزیراعظم صاحب آپ خود معاملات کو دیکھیں، کراچی پیکج کی رفتار کو تیز کیا جائے ، کراچی پیکج سے عوام کو بہت سی توقعات وابستہ ہیں۔
جس پر وزیراعظم نے جواب دیا کہ امین ! میں آپ کی بات سے اتفاق کرتا ہوں اور وزیراعظم نے کراچی ٹرانسفارمیشن پلان پر جمعرات کو اعلیٰ سطح کا اجلاس بلانے کی ہدایت کردی۔
وفاقی وزیر فیصل واوڈا نےبیوروکریسی کی جانب سے مداخلت کا معاملہ اٹھاتے ہوئے کہا بیورو کریسی حکومتی معاملات میں رکاوٹیں کھڑی کر رہی ہے، حکومتی احکامات میں رکاوٹ بننے والے بیوروکریٹس کے خلاف ایکشن لینا ہوگا۔
