کولمبو : وزیراعظم عمران خان کی سری لنکا آمد پر شانداراستقبال کیا گیا اور توپوں کی سلامی پیش کی گئی، منصب سنبھالنے کے بعد وزیراعظم عمران خان کا سری لنکا کا یہ پہلادورہ ہے۔
تفصیلات کے مطابق وزیراعظم عمران خان 2 روزہ سرکاری دورے پر سری لنکا پہنچ گئے ، وزیر خارجہ شاہ محمود قریشی، عبدالرزاق داؤد اور معاون خصوصی ذوالفقار عباس بخاری بھی ان کے ساتھ موجود ہیں۔
کولمبو پہنچنے پر سری لنکن ہم منصب نے ایئرپورٹ پر وزیراعظم پاکستان کا ریڈکارپٹ استقبال کیا جبکہ وزیراعظم کے اعزازمیں استقبالیہ تقریب کا بھی انعقاد کیا گیا ، جس میں عمران خان کو توپوں کی سلامی دی گئی۔
استقبالیہ تقریب میں دونوں ممالک کے قومی ترانوں کی دھن بجائی گئی اور وزیراعظم عمران خان کوگارڈ آف آنر پیش کیاگیا جبکہ سری لنکن فوج کے دستوں نے بھی وزیراعظم کو سلامی دی۔
وزیراعظم کی آمد پر کولمبو ایئر پورٹ پر ویلکم وزیراعظم عمران خان کے بورڈ جبکہ کولمبو کی شاہراہ پرپاکستان کےپرچم آویزاں تھے، منصب سنبھالنے کے بعدعمران خان کا سری لنکا کا یہ پہلا دورہ ہے۔
خیال رہے عمران خان سری لنکا کے وزیراعظم مہندا راجاکی دعوت پردورہ کر رہے ہیں ، وزیراعظم عمران خان کا سری لنکا کا دورہ 2دن پر مشتمل ہوگا، دورے کے دوران وزیراعظم عمران خان سری لنکن صدراورہم منصب سےملاقات کریں گے، ملاقوں میں تجارت، سرمایہ کاری سمیت دیگرامور میں دو طرفہ تعاون پربات ہوگی جبکہ دونوں ممالک کے درمیان مختلف امورمیں مفاہمت کی یادداشتوں پر دستخط ہوں گے۔
وزیراعظم جوائنٹ ٹریڈ اینڈانویسٹمنٹ کانفرنس میں بھی شرکت کریں گے ، پاکستان اور سری لنکادوستی کےدرمیان 1948 سے دوستی کا مضبوط تعلق قائم ہے ، دورہ دونوں ملکوں کےتعلقات ،تعاون کے فروغ میں مددگارثابت ہوگا۔
