اسلام آباد: وزیراعظم عمران خان نے کراچی کی صورت حال کا نوٹس لیتے ہوئے کراچی سے منتخب تمام ارکان اسمبلی کو عید پر اپنے حلقوں میں رہنے کی ہدایت کردی۔
تفصیلات کے مطابق سماجی رابطے کی ویب سائٹ ٹویٹر پر وزیراعظم عمران خان نے اپنے پیغام میں کراچی کی صورت حال کا نوٹس لیتے ہوئے کہا کہ کراچی سے منتخب ارکان اسمبلی عوام کو ہرممکن مدد فراہم کریں۔
وزیراعظم عمران خان نے کراچی کے لیے خصوصی پیکج جلد لانے کی خوشخبری سناتے ہوئے کہا کہ شہرقائد میں سہولتوں کی فراہمی پر جامع پیکج کا ڈرافٹ تیار کر رہے ہیں۔
انہوں نے پاکستان تحریک انصاف کے کراچی سے منتخب ہونے والے ارکان اسمبلی کو عید پر اپنے حلقوں میں رہنے کی ہدایت کی۔
I have directed all MNAs/MPAs of Karachi to be in their constituencies throughout Eid & Independence Day holidays & provide all assistance to the ppl. The Federal Govt is drafting a comprehensive package to end the decades of neglect & suffering of the ppl of this gt metropolis.
— Imran Khan (@ImranKhanPTI) August 12, 2019
عمران خان نے اپنے پیغام میں مزید کہا کہ دہائیوں سے نظرانداز کراچی میں عوام کو درپیش مسائل کا حل نکالا جائے گا۔
کراچی کے مختلف علاقوں میں بارش
ڈائریکٹر محکمہ موسمیات سردار سرفراز کا کہنا ہے کہ آج کراچی میں ہلکی بارش اور بونداباندی کا امکان ہے۔
محکمہ موسمیات کے مطابق گزشتہ روز کراچی میں سب سے زیادہ 192 ملی میٹر بارش فیصل بیس پر ریکارڈ کی گئی اور سرجانی ٹاؤن میں 187ملی میٹر بارش ریکارڈ کی گئی۔
واضح رہے کہ کراچی میں گزشتہ دو روز کے دوران شدید بارش کے باعث اکثر علاقوں کی سڑکیں اور گلیاں تالاب کا منظر پیش کررہی ہیں جبکہ شہر میں بارش کے دوران کرنٹ لگنے اور دیگر حادثات میں 14 افراد جاں بحق ہوئے۔
