اسلام آباد : وزیراعظم عمران خان3سے4جنوری کو ترکی کا دورہ کریں گے، ان کے ہمراہ شاہ محمود قریشی، خسرو بختیار ور عبدالرزاق داؤد بھی ہوں گے۔
تفصیلات کے مطابق وزیراعظم عمران خان آئندہ ہفتے ترکی کے دو روزہ دورے پر روانہ ہوں گے، جہاں وہ ترکی کے صدر رجب طیب اردوان سے ملاقات کریں گے، ملاقات میں پاک ترک تعلقات کو مزید مستحکم کرنے پر بات چیت کی جائے گی۔
اس کے علاوہ مختلف شعبوں میں تعاون بڑھانے پر بھی تبادلہ خیال کیا جائے گا۔ ملاقات میں افغان مفاہمتی عمل پربھی گفتگو کی جائے گی۔ تین اور چار جنوری کو کیے جانے والے دورے میں وزیر خزانہ شاہ محمود قریشی، خسرو بختیار اور عبدالرزاق داؤد بھی وزیر اعظم کے ہمراہ ہوں گے۔
اس حوالے سے ذرائع کا کہنا ہے کہ وزیراعظم عمران خان ترکی میں بزنس فورم سے بھی خطاب کریں گے، اس موقع پر ترک سرمایہ کاروں کو پاکستان میں سرمایہ کاری کی دعوت دی جائے گی، وزیراعظم کے دورہ ترکی سے دونوں ممالک میں تعاون کی نئی راہیں کھلیں گی۔
مزید پڑھیں: ترک وزیرداخلہ کی وزیراعظم عمران خان کو دورہ ترکی کی دعوت
واضح رہے کہ گزشتہ دنوں اسلام آباد میں ترک وزیرداخلہ سلیمان سوئلو نے وزیراعظم عمران خان کوعہدہ سنبھالنے پر مبارکباد دیتے ہوئے دورہ ترکی کی دعوت دی تھی جاور ترک صدر کی جانب سے نیک تمناؤں کاپیغام اور خصوصی پیغام پہنچایا تھا۔
