اسلام آباد: وزیراعظم عمران خان نے کہا سسلین مافیاکی طرح پاکستانی مافیا بھی ہتھکنڈےاستعمال کررہی ہے ،یہ منی لانڈرنگ کے ذریعے بیرون ملک جمع دولت کاتحفظ چاہتےہیں۔
تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اٹلی کے سابق صدر کا مافیا کے حوالے بیان شیئر کرتے ہوئے کہا سسلین مافیاکی طرح پاکستانی مافیابھی رشوت، بلیک میلنگ اور دھمکیوں کے ہتھکنڈے استعمال کررہی ہے، ریاستی اداروں اور عدلیہ پر دباؤ ڈالاجارہا ہے، یہ منی لانڈرنگ کے ذریعے بیرون ملک جمع دولت کا تحفظ چاہتے ہیں۔
یاد رہے چند روز قبل بھی وزیر اعظم نے سماجی رابطے کی ویب سائٹ ٹوئیٹر پر پاکستان کی موجودہ صورتحال پر معروف مصنفہ آئن رینڈ کی تحریر کا حوالہ دیتے ہوئے کہا کہ جو بات انہوں نے لکھی وہ آج بھی حسب حال ہے۔
انہوں نے مزید کہا کہ جب کوئی شے بنانے کیلئے ان لوگوں سے اجازت لینی پڑے جو خود کچھ نہ بناتے ہوں جب پیسہ ان کے پاس ہو جو بہتری کے بجائے ذاتی مفاد کیلئے کام کرتے ہوں، جب قانون بھی ان کو تحفظ دے، بدعنوانی کو ایوارڈ اور دیانتدار ذات کی قربانی ہو، ایسے ہی وقت میں پی ٹی آئی کو حکومت کی باگ ڈور سنبھالنا پڑی۔
اس سے قبل و زیراعظم عمران خان کا کہنا تھا کہ ملک کنگال چھوڑ کر جانے والے ہم سے حساب مانگ رہے ہیں، انہوں نے لوگوں کو دھوکا دیا ہے انہیں شرم آنی چاہئے، یہ لوگ پی آئی اے، بجلی، گیس، ریلوے میں ریکارڈ خسارہ چھوڑ کر گئے، مشکل حالات سے گزرے اب آپ ملک میں استحکام دیکھیں گے۔
