The news is by your side.

Advertisement

وزیر اعظم پیر کو کراچی کا دورہ کریں گے

اسلام آباد: وزیر اعظم عمران خان پیر 21 اکتوبر کو کراچی کا دورہ کریں گے، وزیر اعظم کراچی میں مسائل کے حل کے لیے اہم مشاورت کریں گے۔

تفصیلات کے مطابق وزیر اعظم عمران خان پیر کے روز صوبہ سندھ کے دارالحکومت کراچی کا دورہ کریں گے، اپنے دورے کے دوران وزیر اعظم گورنر سندھ، وفاقی وزرا اور اہم شخصیات سے ملاقاتیں کریں گے۔

ذرائع کا کہنا ہے کہ وزیر اعظم کراچی میں مسائل کے حل کے لیے اہم مشاورت کریں گے۔ وزیر اعظم عمران خان چائنہ پاور پراجیکٹ کا افتتاح بھی کریں گے۔

خیال رہے کہ وزیر اعظم عمران خان کراچی کے مسائل کے حل کے لیے کوشاں ہیں، اس سے قبل کراچی کے مسائل سے متعلق اجلاس میں انہوں نے وزیر قانون فروغ نسیم کی سربراہی میں اعلیٰ سطح کی کمیٹی تشکیل دی تھی۔

وزیر اعظم کا کہنا تھا کہ کراچی پاکستان کا معاشی حب ہے، ماضی کی بد انتظامی، غفلت کا خمیازہ اس شہر کے عوام کو بھگتنا پڑ رہا ہے۔ یہاں صحت کے معاملے میں شدید خطرات لاحق ہیں۔

انہوں نے کہا تھا کہ صاف پانی کی قلت اور صفائی کا ناقص انتظام شہر کے بڑے مسائل ہیں، کراچی کے عوام کو درپیش مسائل پر شدید تشویش ہے۔ چاہتے ہیں شہر کے مسائل حل ہوں اور عوام کو بہتر سہولتیں میسر آئیں۔

وزیر اعظم نے کہا تھا کہ کراچی کے عوام کو درپیش مسائل پر وفاق ہرممکن کردار ادا کرے گی۔

Comments

comments

یہ بھی پڑھیں