اسلام آباد : نگراں وزیراعظم انوارالحق کاکڑ نے ال جومیہ گروپ کو پاکستان میں متبادل توانائی کے شعبے میں سرمایہ کاری کی دعوت دے دی۔
تفصیلات کے مطابق نگراں وزیراعظم انوارالحق کاکڑ سے سعودی ال جومیہ گروپ کے سربراہ کی وفد کے ہمراہ ملاقات ہوئی، ال جومیہ گروپ نے کراچی الیکٹرک میں بڑے پیمانے پرسرمایہ کاری کی ہے.
اس موقع پر نگراں وزیراعظم نے کہا کہ پاکستان اورسعودی عرب میں دیرینہ برادرانہ تعلقات مزید مضبوط ہوئےہیں، پاکستان میں سعودی سرمایہ کاری کا خیرمقدم کرتےہیں۔
انوار الحق کاکڑ کا کہنا تھا کہ پاکستان میں توانائی کےشعبےمیں سعودی سرمایہ کاری خوش آئند ہے، کراچی الیکٹرک کی متبادل توانائی کے شعبے میں سرمایہ کاری اچھا اقدام ہے۔
انھوں نے کہا کہ متبادل توانائی سے صارفین کے لئے بجلی کی قیمتیں کم کرنے میں مدد ملے گی، کے الیکٹرک بلاتعطل بجلی فراہمی کیلئے انفراسٹرکچر میں مزید بہتری لائے گی۔
وزیراعظم کی ال جومیہ گروپ کو پاکستان میں متبادل توانائی کے شعبے میں سرمایہ کاری کی دعوت دی ، وفد نے کراچی الیکٹرک کےدیرینہ مسائل حل کرنے پر وزیراعظم اور حکومت سے اظہارتشکر کیا۔
وفدنےوزیراعظم کو 1500میگاواٹ کےنئےسرمایہ کاری منصوبوں کےحوالےسےآگاہ کیا، جس پر وزیراعظم نے کہا کہ منصوبوں میں مقامی ذرائع اور قابل تجدید توانائی پر انحصار کیا جائے گا۔
