پشاور : وزیراعظم عمران خان قبائلی اضلاع کے لئے صحت انصاف کارڈ کا آج افتتاح کریں گے، پروگرام کےتحت قبائلی علاقوں کے خاندانوں کو ہیلتھ کارڈفراہم کئےجائیں گے اور قبائلی علاقوں میں ہیلتھ کارڈسےتمام طرح کاعلاج مفت ہوسکےگا۔
تفصیلات کے مطابق وزیراعظم ایک اوروعدہ پوراکرنےکو تیار ہیں ، اسلام آباد کے بعد وزیراعظم قبائلی علاقوں کیلئے ہیلتھ سہولت کارڈ پروگرام کا آج افتتاح کریں گے ، مرکزی تقریب گورنر ہاوس میں ہوگی۔
تقریب میں اہم شخصیات کو مدعو کیاگیاہے جبکہ قبائلی ارکان قومی اسمبلی،قبائلی عمائدین بھی تقریب میں شریک ہوں گے، تقریب میں وزیراعظم قبائلی علاقوں کےکچھ لوگوں میں کارڈتقسیم کریں گے۔
پروگرام کے تحت قبائلی علاقوں کےخاندانوں کوہیلتھ کارڈ فراہم کئےجائیں گے اور ہیلتھ کارڈسےتمام طرح کا علاج مفت ہوسکےگا۔
یاد رہے 4 فروری کو وزیراعظم عمران خان نے صحت انصاف کارڈکے پہلے مرحلے کا آغاز کیا تھا صحت کارڈ سے عام آدمی سات سےنولاکھ روپے تک کا علاج کرواسکے گا۔
مزید پڑھیں : وزیراعظم عمران خان نے صحت انصاف کارڈ کے پہلے مرحلے کا آغاز کردیا
تقریب سے خطاب میں وزیراعظم عمران خان کا کہنا تھا کہ صحت کارڈ کے اجرا کا مقصد بھی غربت میں کمی ہے، ہماری ہر پالیسی کا محور غربت ختم کرنا ہوگا چاہے جو بھی پالیسی ہو، ملکی تاریخ میں پہلی بارغربت میں کمی کا پروگرام لارہےہیں۔
ذرائع کا کہنا تھا کہ پہلےمرحلےمیں اسلام آباد کے85 ہزار مستحقین میں کارڈ تقسیم کیے جائیں گے، صحت کارڈ سے ملک کے ڈیڑھ کروڑ غریب خاندان مستفید ہوں گے، کارڈ ہولڈر کو7 لاکھ 20 ہزار روپے تک کے اخراجات کی سہولت دستیاب ہوگی، جبکہ مریض 150 سے زائد سرکاری و نجی اسپتالوں میں علاج کرواسکیں گے۔
