اسلام آباد: وزیر اعظم میاں نواز شریف نے اسلام آباد میں بحرین کے تعاون سے قائم کی جانے والی شاہ حماد نرسنگ یونیورسٹی کا سنگ بنیاد رکھ دیا۔ اس موقع پر وزیر اعظم کا کہنا تھا کہ صحت کے پروگرام کے ساتھ بیماریوں سے بچاؤ پر بھی توجہ دے رہے ہیں۔
تفصیلات کے مطابق اسلام آباد میں بحرین کے تعاون سے پہلی نرسنگ یونیورسٹی کے سنگ بنیاد رکھنے کی تقریب سے خطاب کرتے ہوئے وزیر اعظم نے کہا کہ صحت پروگرام کے تحت نادار طبقے کو صحت کی مفت سہولیات فراہم کی جا رہی ہیں۔
انہوں نے کہا کہ نرسنگ یونیورسٹی کے قیام سے صحت کے شعبے کی بہتری کے لیے معیار اور تربیت یافتہ افرادی قوت میسر آئے گی اور یہ صحت کے شعبے کی تقویت کا باعث ہوگی۔
تقریب میں بحرین کے کمانڈر کا خیر مقدم کرتے ہوئے وزیر اعظم نے کہا کہ پاکستان اور بحرین کی مثالی دوستی پر فخر ہے۔ جدید نرسنگ یونیورسٹی کے قیام کے لیے بحرین کے تعاون کے شکر گزار ہیں۔
وزیر اعظم کا کہنا تھا کہ یونیورسٹی کا تحفہ بحرین کی طرف سے پاکستانی عوام کے ساتھ گہری محبت کا اظہار ہے اور یہ یونیورسٹی 2 برادر اسلامی ممالک کے بہترین تعلقات کی عکاس ہے۔
شاہ حمد نرسنگ یونیورسٹی میں 2 ہزار طلبہ کو تعلیمی سہولیات میسر ہوں گی۔ نرسنگ یونیورسٹی اینڈ ایسوسی ایٹڈ میڈیکل سائنسز میں سالانہ 5 سو طلبہ داخلہ لے سکیں گے جبکہ ایک ہزار طلبہ کو ہاسٹل کی سہولت میسر ہوگی۔
0
20
