اسلام آباد: وزیراعظم عمران خان کی زیرصدارت ہونے والے اجلاس میں کم آمدنی والے طبقے کو پیٹرول اور دیگر اشیا پر سبسڈی دینے کا پروگرام جلد شروع کرنے کی ہدایت کردی۔
اے آر وائی نیوز کے مطابق وزیراعظم عمران خان کی زیرصدارت پارٹی قیادت کا اجلاس ہوا، جس میں ملک میں جاری مہنگائی، پیٹرولیم مصنوعات کی قیمتوں اور عوامی مسائل کے حوالے سے گفتگو کی گئی۔
وزیراعظم نے اجلاس میں شرکا سے گفتگو کرتے ہوئے کہا کہ غریب طبقے کے لیے ٹارگٹڈ سبسڈی کا بڑا پروگرام جلد شروع کیا جائے، مہنگائی کے اثرات کا احساس ہے اور اسی لیے حکومت صحت کارڈ، کسان کارڈ اور احساس پروگرام کے دائرہ کار کو بڑھا رہی ہے۔
وزیر اعظم نے ٹارگٹڈ سبسڈی پروگرام کو جلد حتمی شکل دینے کی ہدایت کی۔
اجلاس میں کم آمدنی والے طبقےکوپٹرول پر سبسڈی دینے کی تجویز بھی دی گئی۔ گورنر سندھ عمران اسماعیل نے بتایا کہ وزیراعظم نے ایسی اسکیم تیار کرنے کی ہدایت کی ہے جس کے تحت رکشہ، عوامی سواری والوں کو پیٹرول پر سبسڈی دی جائے گی۔
انہوں نے بتایا کہ مہنگائی کو قابو کرنے کے لیے ذیلی کمیٹیوں کے قیام کی ہدایت کی گئی ہے، جو فوری طور پر اقدامات کریں گی اور ایک ہفتے میں مہنگائی میں کمی آجائے گی۔
مزید پڑھیں: دنیا کی مہنگائی کا اثر پاکستان پر پڑا، سندھ میں سب سے زیادہ مہنگائی ہے، گورنر سندھ
علاوہ ازیں وزیراعظم عمران خان نے پی ڈی ایم کے احتجاج کے خلاف پی ٹی آئی کے اراکین اسمبلی کو بھی متحرک رہنے اور انہیں حلقوں میں جاکر عوامی مسائل حل کرنے کی ہدایت کی۔
اس سے قبل گورنر سندھ عمران اسماعیل نے میڈیا سے گفتگو کرتے ہوئے کہا تھا کہ دنیا میں مہنگائی کے اثرات پاکستان پر پڑ رہے ہیں مگر اس وقت سندھ میں سب سے زیادہ مہنگائی ہے کیونکہ صوبے میں آٹے کی قیمتیں نیچے نہیں آرہیں۔
عمران اسماعیل نے بتایا تھا کہ وزیراعظم نےمہنگائی کے معاملے پر ذیلی کمیٹی بنانےکی ہدایت کی ہے، جس کے ذریعے گھی،چینی ودیگراشیاکی قیمتوں پرکنٹرول کیاجائےگا۔
