لاہور : لاہور ہائی کورٹ نے وزیر اعظم آفس کا ہدایت کی کہ سول اور ملٹری ایجنسیوں کو ججز اور ان کے عملے سے رابطہ کرنے سے روکیں۔
تفصیلات کے مطابق لاہور ہائیکورٹ نے اے ٹی سی سرگودھا کے جج کو ہراساں کرنے کے متعلق گزشتہ سماعت کا تحریری فیصلہ جاری کر دیا۔
لاہور ہائیکورٹ کے جسٹس شاہد کریم نے انسداد دہشت گردی عدالت کے جج کیساتھ ناخوش گوار واقعہ کے معاملے پر عبوری تحریری فیصلہ جاری کیا۔
فیصلے میں حکم دیا کہ وزیر اعظم آفس سے یہ ہدایت جاری کی جائیں گی کہ آئی بی، آئی ایس آئی سمیت تمام سول اور ملٹری ایجنسیوں کو اعلی اور ماتحت عدلیہ کے ججز اور ان کے عملے سے رابطہ نہیں کریں گے اور آئی جی پولیس پنجاب بھی ان کے ماتحت افسروں کو عدلیہ میں مداخلت سے روکیں۔
عدالت نے پولیس کو حکم دیا کہ انسداد دہشت گردی عدالتوں کی سیکیورٹی کے اگر کوئی حفاظتی اقدامات کرنے ہیں تو متعلقہ جج سے مشاورت اور اتفاق رائے کے بغیر نہ کیے جائیں۔
عدالت نے ہدایت کی کہ پنجاب کی انسداد دہشت گردی عدالتیں 9 مئی کےتمام مقدمات پر ترجیحی بنیادوں پر فیصلہ کریں۔
عدالت نے مزید کہا کہ انسداد دہشت گردی عدالت کے جج سرگودھا کے معاملہ پر عدالتی عملہ تفتیش میں مکمل تعاون کرے اور تفتیش کی وڈیو ریکارڈ کرکے ہائیکورٹ کو فراہم کی جائے اور عمل درآمد رپورٹ 8 جولائی تک داخل کرانے کا بھی حکم دے دیا۔
