اسلام آباد : وزیراعظم شہبازشریف نے پیٹرول کی قیمت میں اضافے کے بعد کی صورتحال کا جائزہ لینے کے لیے اعلیٰ سطح کا اجلاس طلب کر لیا۔
تفصیلات کے مطابق وزیراعظم شہبازشریف نے اعلیٰ سطح کا اجلاس طلب کر لیا ، جس میں وزارت خزانہ،توانائی،پٹرولیم اور منصوبہ بندی کےحکام شریک ہوں گے۔
اجلاس میں پیٹرولیم مصنوعات کی قیمت میں اضافے کے بعد کی صورتحال کا جائزہ لیا جائے گا۔
یاد رہے پیٹرول کی قیمتوں میں اضافے کے بعد وزیراعظم نے قوم سے خطاب میں کہا تھا کہ آج کا مشکل فیصلہ قوم کو مشکل سے نکالنے کے لیے اہم ہے، ہم نے دل پر پتھر رکھ کر گزشتہ روز پیٹرولیم مصنوعات کی قیمتوں میں اضافہ کیا۔
شہباز شریف نے ریلیف پیکج کا اعلان کرتے ہوئے کہا فوری طور پر ایک کروڑ 40 لاکھ غریب خاندان کو 2 ہزار روپے دیے جا رہے ہیں، آئندہ مالی سال کے لیے اس ریلیف پیکج کو بجٹ میں شامل کیا جائے۔
اس سے قبل وزیراعظم شہباز شریف نے قومی اسمبلی کے اجلاس میں عمران خان کو مذاکرات کی پیشکش کرتے ہوئے کہ تھا کہ بات چیت کے دروازے کھلے ہیں لیکن یہ فیصلہ ایوان کرے گا کہ کب الیکشن کرانا ہے۔
