اسلام آباد : وزیراعظم شہباز شریف نے کہا ہے کہ سعودی عرب کا اعلیٰ سطح کا وفد جلد پاکستان کا دورہ کرے گا ، ہمارے دورہ سعودی عرب کے موقع پر سعودی ولی عہد نے بھرپور پذیرائی کی۔
اسلام آباد میں سیرت میوزیم کا سنگ بنیاد رکھنے کی تقریب سے خطاب کرتے ہوئے ان کا کہنا تھا کہ جب بھی پاکستان پر کوئی مشکل وقت آیا سعودی عرب نے دل کھول کر ہمارا ساتھ دیا۔
انہوں نے بتایا کہ اساتذہ کی محنت سے قرآن کریم کا نور بچوں کے دلوں میں اتارا گیا، قرآن کریم کے کمسن حفاظ کو مبارکباد اور رابطہ عالم اسلامی کے سیکریٹری جنرل کو حکومت پاکستان اور عوا م کی طرف سے خوش آمدید کہتا ہوں۔
وزیراعظم نے کہا کہ خادم حرمین شریفین اور سعودی ولی عہد شہزادہ محمد بن سلمان کا سیرت میوزیم منصوبے کیلئے تہہ دل سے مشکور ہوں، فیصل مسجد سے سیرت میوزیم تک سعودی عرب کی قیادت کی محبتوں کے نشانات دیکھے جاسکتے ہیں۔
ان کا کہنا تھا کہ سعودی قیادت کی محبت کے جذبات ہمارے لیے قیمتی سرمایہ ہیں، سعودی ولی عہد نے ہمارے دورے میں وفد کی پذیرائی کی، ان کی محبت کو بیان نہیں کیا جاسکتا، انہوں نے بتایا کہ سعودی عرب کا اعلیٰ سطح کا وفد جلد پاکستان کا دورہ کرے گا۔
سعودی ولی عہد نے کہا ہے کہ پاکستان ہمارے دل کے بہت قریب ہے، انہوں نے پاکستان کے عوام کے لیے بے پناہ محبت کے جذبات کا اظہار کیا ہے۔
سعودی عرب ہمیشہ اچھے اور برے وقت میں پاکستان کے ساتھ کھڑا رہا ہے، جب بھی پاکستان پر مشکل وقت آیا سعودی عرب نے دل کھول کر پاکستان کا ساتھ دیا، پاکستان کی ترقی اور خوشحالی کیلئے سعودی عرب مختلف شعبوں میں تعاون فراہم کررہا ہے۔
وزیراعظم کا کہنا تھا کہ سیرت میوزیم اسلامو فوبیا کے ناپاک پراپیگنڈے کے خاتمے میں اہم کردار ادا کرے گا۔
گزشتہ چند دہائیوں کے دوران وسائل پر قبضے کی جنگ کی وجہ سے نظریاتی تصادم پیدا کیا گیا، اسلام اور مسلمانوں کے بارے میں منفی اور گمراہ کن پروپیگنڈہ کیا جاتا رہا ہے۔
سیرت میوزیم دو مختلف زاویوں سے اہم خدمت سرانجام دے سکتا ہے، یہ میوزیم لوگوں کی تربیت کا باعث بنے گا یہ ایک ایسا عظیم منصوبہ ہے جو منفی پروپیگنڈے کا جواب مہیا کرے گا، غیر مسلم بھی یہ جان سکیں گے وہ جس کے بارے میں پراپیگنڈہ کرتے ہیں وہ ہستی کیسی تھی۔
وزیراعظم شہبازشریف نے مزید کہا کہ مظلوم فلسطینیوں کی ہر قسم کی مدد کیلئے تیار ہیں، اس موقع پر انہوں نے قرآن پاک کے کمسن حفاظ کرام میں انعامات بھی تقسیم کیے۔
