اسلام آباد: وزیر اعظم شہباز شریف نے کہا ہے کہ سی پیک چینی صدر کے پاکستانی عوام کی فلاح و بہبود کے عزم کی عکاسی کرتا ہے۔
تفصیلات کے مطابق اقتصادی راہداری منصوبے کی دسویں سالگرہ پر وزیر اعظم شہباز شریف نے جاری کردہ بیان میں کہا ہے کہ چینی صدر شی جن پنگ کا بے حد مشکور ہیں۔
وزیر اعظم نے کہا کہ چینی صدر نے سی پیک کے 10سال مکمل ہونے پر پاکستان سے حمایت، یکجہتی کا پیغام دیا انہوں نے کہا کہ چینی صدر نے سی پیک کو اعلیٰ معیار کے بیلٹ اینڈروڈ آپریشن کا ایک مثالی منصوبہ بنایا۔
اقتصادی راہداری منصوبے کی 10 ویں سالگرہ: چینی صدر کا پاکستان کے لیے اہم اعلان
وزیر اعظم شہباز شریف کا کہنا تھا کہ سی پیک چینی صدر کے پاکستانی عوام کی فلاح وبہبود کے عزم کی عکاسی کرتا ہے، سی پیک نے 10 سال میں سماجی واقتصادی، توانائی شعبوں میں کئی سنگ میل عبور کئے۔
انہوں نے کہا کہ سی پیک نواز شریف کی قیادت میں تبدیلی کا اہم موڑ ہے، پاکستان اس منصوبے کی کامیابی کو دوستوں، شراکت داروں کیساتھ بانٹنے کو تیار ہے۔
وزیراعظم شہباز شریف نے مزید کہا کہ پاک چین اسٹریٹجک پارٹنر شپ نئی بلندی پر لیجانے میں چینی صدر کا کردار قابل تعریف ہے، سی پیک دوسرے مرحلےکی کامیابی اور جذبے کے ساتھ کام کرنے کیلئے پر عزم ہیں۔
