مکہ مکرمہ : وزیراعظم شہباز شریف نے عمرے کی سعادت حاصل کرلی، اس موقع پر انھوں نے ملک و قوم اورامت مسلمہ کی فلاح و بہبود اورترقی کیلئے دعا کی۔
تفصیلات کے مطابق وزیراعظم شہباز شریف اپنے دورہ سعودی عرب کے دوران عمرے کی ادائیگی کے لیے اپنے وفد کے ہمراہ بذریعہ ٹرین مکہ مکرمہ روانہ ہوئے۔
وزیراعظم نےمکہ مکرمہ میں اپنےوفد کےہمراہ عمرہ اداکیا اور خانہ کعبہ میں نوافل ادا کیے۔
اس موقع پروزیر اعظم نے ملک و قوم اورامت مسلمہ کی فلاح و بہبود اورترقی کیلئے دعا کی۔
یاد رہے کہ گزشتہ روز وزیراعظم محمد شہباز شریف نے دورہ سعودی عرب کے دوران مسجد نبویﷺ میں حاضری دی اور اپنے وفد کے ہمراہ روضہ رسولﷺ کی زیارت کی سعادت حاصل کی تھی اور نماز جمعہ کی ادائیگی کے بعد مکہ مکرمہ روانہ ہوئے تھے۔
واضح رہے کہ وزیر اعظم شہباز شریف 4 روزہ دورے پر سعودی عرب میں موجود ہیں، جہاں انہوں نے جدہ میں سعودی ولی عہد محمد بن سلمان سے ملاقات کی تھی۔ جس میں پاکستان اور سعودی عرب نے دفاعی اور سکیورٹی تعاون مزید مضبوط بنانے پر اتفاق کیا اور باہمی شراکت داری کو نئی بلندیوں تک پہنچانے کے عزم کا اعادہ کیا گیا تھا۔
