اسلام آباد: وزیراعظم شہباز شریف کا کہنا ہے کہ آئندہ بجٹ میں عام آدمی کوریلیف دینے کے حوالے سے ہر ممکن اقدامات کئے جائیں۔
تفصیلات کے مطابق وزیراعظم شہباز شریف کی زیر صدارت مالی سال 2023-24 کے بجٹ کی تیاری کا اجلاس ہوا، معاشی ٹیم کی جانب سے وزیراعظم کو بجٹ کی تیاریوں پر بریفنگ دی گئی۔
بریفنگ میں بتایا گیا کہ آئندہ مالی سال کا بجٹ وفاقی کابینہ کی منظوری سے9 جون2023کو پیش ہوگا، معیشت مالیاتی استحکام کی جانب گامزن اور مالیاتی خسارے میں مسلسل کمی آ رہی ہے۔
اجلاس میں آمدن اور محصولات سےمتعلق نظر ثانی شدہ اوراگلے سال کے ٹارگٹڈ تخمینہ جات پر بھی بریفنگ دی گئی۔
وزیراعظم شہباز شریف نے کہا کہ آئندہ بجٹ میں عام آدمی کوریلیف دینے کے حوالے سے ہر ممکن اقدامات کئے جائیں اور غریب اور متوسط طبقے کی مالی مشکلات میں کمی کے لیے تمام وسائل بروئے کار لائے جائیں۔
شہباز شریف نے اطمینان کا اظہار کیا کہ بروقت حکمت عملی سے یوریا کھاد کی قیمتیں مسلسل کم ہو رہی ہیں، گزشتہ 2ماہ میں کئی سال بعد کرنٹ اکاؤنٹ سرپلس حاصل کیا گیا۔
انھوں نے ہدایت کی کہ پنشن ریفارمز کو جلد از جلد حتمی شکل دی جائے اور تخلیقی طریقہ کار اپناتےہوئےپنشن فنڈ قائم کیا جائے تاکہ قومی خزانہ پر بوجھ کم کیا جا سکے۔
وزیراعظم کا کہنا تھا کہ پنشنرز کی بہترین فلاح و بہبود ممکن بنائی جاسکے اور محصولات بڑھانے کیلئےٹھوس اقدامات اورٹیکس نیٹ میں اضافہ کیا جائے۔
