پیرس : وزیراعظم شہباز شریف نے چینی وزیراعظم لی کی چیانگ سے ملاقات میں پاکستان کی سالمیت، خودمختاری اور سماجی ومعاشی ترقی کیلئے حمایت کا شکریہ ادا کیا۔
تفصیلات کے مطابق وزیراعظم شہبازشریف اور چین کے وزیراعظم لی کی چیانگ کی ملاقات ہوئی، شہبازشریف کی رواں سال وزارت عظمیٰ سنبھالنے والے چینی ہم منصب سے پہلی ملاقات تھی۔
ملاقات پاکستان اور چین کی سدابہارآزمودہ کوآپریٹوشراکت داری کی روایتی پرجوش ماحول میں ہوئی، جس میں سی پیک سمیت دوطرفہ تعلقات کے تمام پہلوؤں اورمعاشی تعاون پر تفصیلی بات چیت ہوئی۔
وزیراعظم نے پاکستان کی سالمیت، خودمختاری ،سماجی ومعاشی ترقی کیلئے چین کی حمایت کا شکریہ ادا کرتے ہوئے کہا کہ کشمیر کے متنازع خطےمیں جی20 اجلاس بلانےکی چین کی مخالفت اصولی مؤقف کا مظہر ہے۔
شہباز شریف کا کہنا تھا کہ پاک،چین دوستی منفرد اور عوام کے درمیان موجود گہرےبرادرانہ جذبات پر استوار ہے، جس پر چینی وزیراعظم نے کہا کہ آئرن برادر پاکستان چین کی ہمسایوں سے متعلق سفارتکاری میں خصوصی درجہ رکھتا ہے۔
