اسلام آباد: حکومت نے میڈیکل و ڈینٹل کالجز کی رجسٹریشن پر پابندی لگانے کا فیصلہ کرلیا ہے۔
ذرائع کے مطابق پاکستان میڈیکل اینڈ ڈینٹل کونسل (پی ایم ڈی سی) نے کالجز رجسٹریشن پر پابندی کے فیصلے کی منظوری دے دی ہے، اب پی ایم ڈی سی نئے میڈیکل و ڈینٹل کالجز کی رجسٹریشن نہیں کرے گی۔
ذرائع کا کہنا ہے کہ 5 جنوری کے بعد کی میڈیکل کالجز رجسٹریشن کی درخواستوں پر غور نہیں ہو گا جبکہ 5 جنوری سے قبل کی 13 میڈیکل کالجز کی درخواستیں زیر غور آئیں گی۔
ذرائع کا مزید کہنا ہے کہ میڈیکل کالجز کیلئے فیکلٹی کی کمی پر رجسٹریشن پر پابندی کا فیصلہ ہوا، ملک بھر میں میڈیکل و ڈینٹل کالجز کی تعداد 187 ہے، ملک میں نجی میڈیکل و ڈینٹل کالجز 121 اور سرکاری 66 ہیں۔
یاد رہے کہ گزشتہ ماہ پاکستان میڈیکل اینڈ ڈینٹل کونسل (پی ایم ڈی سی) نے مبینہ طور پر نجی میڈیکل اور ڈینٹل کالجوں کی جانب سے فیسوں کی وصولی پر پابندی عائد کر دی تھی۔
ذرائع نے اس حوالے سے بتایا تھا کہ گزشتہ پانچ سالوں میں نجی میڈیکل کالجز 15 ملین روپے سے زائد فیسیں وصول کر رہے ہیں۔
