مسلم لیگ ن کو نئی مشکل نے آن گھیرا ہے اور ان کے اپنے لگائے گئے گورنر پنجاب بلیغ الرحمٰن وزیراعلیٰ پرویز الہٰی کو ڈی نوٹیفائی کرنے میں ہچکچاہٹ کا شکار ہیں۔
اے آر نیوز کے مطابق ن لیگی رہنماؤں کے دعوؤں کے برعکس گورنر پنجاب بلیغ الرحمٰن نے اپنی ایڈوائس پر اعتماد کا ووٹ نہ لینے پر وزیراعلیٰ چوہدری پرویز الہٰی کو تاحال ڈی نوٹیفائی نہیں کیا ہے جس کے متعلق ذرائع کا کہنا ہے کہ گورنر پنجاب اس معاملے پر ہچکچاہٹ کا شکار ہیں جس کے باعث وفاق میں حکمراں ن لیگ کو ایک نئی مشکل کا سامنا ہے۔
ذرائع کے مطابق گورنر بلیغ الرحمٰن کو ان کے قریبی ماہرین قانون نے وزیراعلیٰ پرویز الہٰی کو ڈی نوٹیفائی کرنے کے خلاف رائے دی تھی جس کے باعث وہ اس معاملے پر اب تک کوئی واضح فیصلہ نہیں کرسکے ہیں۔
ذرائع کا کہنا ہے کہ اس نئی مشکل کے بعد اب ن لیگی رہنماؤں نے وزیراعلیٰ کو ڈی نوٹیفائی کرنے کے لیے گورنر پنجاب کو منانے کی کوششیں شروع کردی ہیں اور اپنی قانونی ٹیم سے ان کے تحفظات دور کرنے کے لیے دلائل دلائے جا رہے ہیں۔
ذرائع نے یہ بھی بتایا ہے کہ اگر اتفاق رائے نہ ہوا تو پھر گورنر پنجاب کی تبدیلی پر بھی غور کا امکان ہے۔
واضح رہے کہ گورنر پنجاب بلیغ الرحمٰن نے وزیراعلیٰ چوہدری پرویز الہٰی کو منگل 21 دسمبر کو اعتماد کا ووٹ لینے کی ایڈوائس دی تھی تاہم اسپیکر نے گورنر کے احکام کو غیر قانونی قرار دیا اور وزیراعلیٰ نے اعتماد کا ووٹ نہیں لیا۔
پرویز الہٰی کی جانب سے اعتماد کا ووٹ نہ لینے پر وفاقی وزیر داخلہ رانا ثنا اللہ، عطا تارڑ سمیت دیگر لیگی رہنماؤں کا کہنا تھا کہ پرویز الہٰی وزیراعلیٰ نہیں رہے اور گورنر ان کو ڈی نوٹیفائی کرنے کا نوٹیفکیشن جاری کریں گے۔
