لاہور: عمران خان نے کہا ہے کہ ن لیگ پنجاب کی ایم کیوایم بن گئی ہے، انہوں نے بلدیاتی الیکشن میں لاہور کے شہریوں سے خوف کے بت توڑنے کی اپیل کردی۔
عمران خان لاہور میں تحریک انصاف کےقتل ہونے والے دو کارکنوں کے اہل خانہ سے تعزیت کیلئے ان کے گھر گئے، چوہدری محمد سرور، عبدالعلیم خان شفقت محمود سمیت دیگررہنما بھی عمران خان کے ہمراہ تھے۔
اس موقع پر میڈیا سے گفتگو کرتے ہوئے عمران خان نے کہا کہ پولیس کی سرپرستی میں تحریک انصاف کے کارکنوں کو قتل کیا گیا، پولیس قاتلوں کو گرفتار کرنے کی بجائے ان کی پشت پناہی کررہی ہے۔
انہوں نے کہا کہ لاہور والوں کو اب خوف کے بت توڑنا ہوں گے، خوف کے سامنے سرجھکانا بت پرستی ہے، اگر خوف کے خلاف جنگ نہ کی گئی تو حالات مزید سنگین ہوجائیں گے۔
عمران خان نے کہا کہ اگر تحریک انصاف کے کارکنوں کے قاتلوں کو گرفتار نہ کیا گیا تو آئی جی پنجاب کے دفتر کا گھیراؤ کریں گے۔
