The news is by your side.

Advertisement

ایم کیو ایم نے مسلم لیگ ن کو ہری جھنڈی دکھادی

مسائل بہت ہیں کسی غیرجمہوری عمل کا حصہ نہیں بنیں گے، خالد مقبول

کراچی: ایم کیو ایم پاکستان اور مسلم لیگ ن کے وفد کی ملاقات ہوئی جس میں‌ سیاسی صورت حال، بلدیاتی انتخابات کے حوالے سے تبادلہ خیال کیا گیا.

نمائندہ اے آر وائی نیوز کے مطابق ایم کیو ایم پاکستان کے کنوینئر خالد مقبول صدیقی سے مسلم لیگ ن کے وفد نے ایم کیو ایم پاکستان کے بہادرآباد مرکز میں ملاقات کی۔

مسلم لیگ ن کے وفد میں شاہد خاقان عباسی، احسن اقبال، ودیگر رہنما شامل تھے۔

شاہد خاقان عباسی نے خالد مقبول صدیقی کو مخاطب کرتے ہوئے کہا کہ خالد بھائی بڑے دنوں بعد ملاقات ہوئی ہے جس پر خالد مقبول کا کہنا تھا کہ جی آپ جیل میں تھے جب آپ باہر آئے تو ہم کابینہ سے باہر آگئے۔

شاہد خاقان عباسی کاکہنا تھا کہ ایم کیو ایم کا پارلیمان میں سچ کا ساتھ دینے پر شکریہ ادا کرتے ہیں۔

مزید پڑھیں: شہباز شریف کی ہدایت پر 4 رکنی پارٹی وفد کراچی پہنچ گیا

سابق وزیر داخلہ احسن اقبال نے کہا کہ آپ شہری سندھ کی نمائندہ جماعت ہیں عوام کے مسائل کو جانتے ہیں، چاہتے ہیں عوام کے حقوق کی جدوجہد مل کر کریں۔

خالد مقبول صدیقی نے کہا کہ مسائل بہت ہیں لیکن کسی غیرجمہوری عمل کا حصہ نہیں بنیں گے، عوام کا مقدمہ پارلیمان میں لڑ رہے ہیں، مسائل حل نہ ہونے پر ہی حکومت سے باہر آئے ہیں۔

واضح رہے کہ شہباز شریف کی ہدایت پر ن لیگ کے مرکزی عہدیداروں کا 4 رکنی وفد 2 روزہ تنظیمی دورے پر کراچی پہنچا ہے، شاہد خاقان عباسی اور سیکریٹری جنرل احسن اقبال وفد کی قیادت کی۔ مصدق ملک اور پارٹی ترجمان مریم اورنگزیب بھی وفد میں شامل ہیں۔

شاہد خاقان کا کہنا تھا کہ آج کسی کو احسا س نہیں کہ عوام مہنگائی چکی میں پس رہے ہیں، حکومت اس پر کوئی جواب نہیں دے پائی ہے، ہم اقتدار کے بھوکے نہیں ہیں، ہم چاہتے ہیں کہ عوام فیصلہ کرے ملک میں حکومت کیسے ہوگی۔

Comments

یہ بھی پڑھیں