ہوسٹن / کراچی: پاکستان مسلم لیگ ن کے رہنما اور سابق وزیر اعلیٰ سندھ جام صادق کے صاحبزادے امریکا میں جبکہ ایم کیو ایم پاکستان کے رکن سندھ اسمبلی محمد وجاہت آج شہر قائد میں انتقال کرگئے۔
تفصیلات کے مطابق پاکستان مسلم لیگ ن سندھ کے ضلع سانگھڑ سے تعلق رکھنے والے رہنما جام معشوق علی طویل علالت کے بعد امریکا کے شہر ہوسٹن میں انتقال کرگئے۔
سابق وزیر اعلیٰ سندھ جام صادق کے صاحبزادے امریکا میں زیر علاج تھے، مسلم لیگ ن کے رہنما کی موت پر سیاستدانوں اور مختلف شخصیات نے دکھ اور رنج کا اظہار کیا۔
نوازشریف نے 2015 میں وزارتِ عظمیٰ کا منصب سنبھالا تو جام معشوق کو سیاسی امور کا مشیر مقرر کیا، بعد ازاں شاہد خاقان عباسی نے اپنے دور میں مشیر برائے وزیراعظم تعینات کیا۔
ایم کیو ایم پاکستان کے رکن اسمبلی کا انتقال
دوسری جانب ایم کیو ایم پاکستان کے پی ایس 94 سے منتخب ہونے والے رکن سندھ اسمبلی محمد وجاہت بھی آج صبح انتقال کرگئے، ایم کیو ایم رابطہ کمیٹی نے اُن کے انتقال پر اہل خانہ سے تعزیت کی۔ ترجمان ایم کیو ایم پاکستان کے مطابق محمد وجاہت طویل عرصے سے سرطان کے عارضے میں مبتلا تھے۔
مرحوم کی تدفین کورنگی قبرستان میں کی گئی، نماز جنازہ میں ڈپٹی کنونیئر کنور نوید جمیل سمیت اراکین رابطہ کمیٹی اور ممبران اسمبلی نے شرکت کی۔
